nerynge und handelynge to Lubeke, dar wy quat weder by komen kunnen doch al dync moet staen wend in dey Akervard, er ic icht vastes anneme dar bynnen mach dat noch al gud werden. Got vorsey unser allerbeste to ewycheyt amen. Doet wol und sendet my 50 punt mandelen und 50 punt ryses und 25 punt rosynen und 25 punt vygen in Polkes ofte in Cryspyns tunne beslagen.
52. Sivert Veckinchusen in Köln an Hildebrand Veckinchusen in Brügge – 1411 Febr. 13.
- Rev. St.-A. Orig. Pap. Adr.: Dem erbarn Hyldebrand Veckynchusen to Brugge littera detur.
Broderlyke leyve vorscreven, wetet dat ju Slyper sendet dey cronen und nobelen, dar hey syn lyf solde umme vorlorn hebben, dat doch grot jammer were ghewest, dat eyn gud man umme alsoker saken wyllen solde to schanden komen hebben und dar gy und wy alle, dey in der selscap syn, umme to schanden komen hedden, dar Got wol vorhort hevet met syner grotlyken ghenaden wand hedde ju bewysinge nicht so ghuot ghekomen, so hedde eme suome wesen vorderflyc to werden. Op dat gelt es eyn isterment ghemaket, dat en darf ju Slyper nicht senden, er hey dar vorder umme sproken hevet; to den saken moste ummermer scheyn met scryven ofte met andern saken, al woe gy eme doen umme vele sake wyllen, Slyper werd nummer tovreden, est dat dey selscap nicht mer to dessen saken doet, wand hey mach nicht mer doen myt worden noch met wercken bynnen ofte buten Kolnne.
Item ic wolde dat gy van Hans van Mynden rekenscap hedden van al unsen dyngen und dat wy al unse dync slecht mochten maken. Item my duochte god, dat Tomass Veckynchusen screven, dat wy eme dat gelt half geven wolden op sunte Johannes dach und dat hey dey ander helfte noch 2 jar staen leyte ofte 1 jar, wand sal men dat nu al betalen dat solde al unse selscap to schanden maken.
Item Peter hevet uns screven, dat hey ut Venedyen sant hevet an eyngevere und andern cruode mer dan op 8000 ducaten und wel uns gudes ghenoch senden, men al dey wessele, dey hey betalen mote, sole al unse selscap to schanden maken. Grotet myn suster und alle vrunt. Ghescreven 11 dage na unser leyven vrowen dage lechtmyssen 1411 jar.
Doet wol und antwordet elken synen breyf sulven in dey hand ofte es her Jorden dar nicht, so schycket eme dey breyfe by wyssen luden oft holdet dey, wand hey dar weder komet, dat dey breyve ummer nicht vorbystert werden. Item doet wol und maket my hyr over van den wasse 400 gulden also gy eyrst kunnen hyr ofte met den erysten in der mysse to Vrancvord to untfangen und ic moet in der mysse 600 gulden opnemen, dar reydet ju tovor dey 80 ℔ gr., dey ic ju lest overmakede.
Briefwechsel Hildebrand Veckinchusen, Seite 67. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_067.jpg&oldid=- (Version vom 31.7.2018)
