also gy best kunnen. Ic hebbe noch hyr van juwer wegen 384 gulden, dey hedde ic ju gerne sand, men ic meyne, gy nemen dey op darumme dorfte ic ju der nicht senden. Ic wet ju wat mer scryven, ic wel juwen breyf to Lubeke und myn gudduncken darby scryven und ic sende ju 2 breyve, dey van Lubeke komen syn, dey latet utscryven met den eyrsten und sendet my dey breyve weder, ofte Peter bynnen kord queme, dat dey breyve hyr syn und gy mogen met Slyper ok dey scryft overseyn und ramen al umme des besten. Anders nicht, men grotet myn suster und al vrunt. Ghescreven 8 dage na paschen 1411 jar.
Item segget Slyper, dat hey my kope 2 verdel guder bottern und kopet gy my 2 dordel Tomas, rot und bla, den kyndern ofte van eynen Eyngelschen ofte van eynen andern laken, crumppen und schorn, und nicht alto kostlyc und ok Lyseken sward wand, also ic ju erscreven hebbe. Grotet Slyper und al vrunt. Ghebeydet over my altyt.
56. Ludwig Buggendal in Danzig an Hildebrand Veckinchusen in Brügge. – 1411 Juni 30.
- Rev. St.-A. Orig. In dorso von der Hand des Empfängers: 1411, 2 in den ouste. Adr.: An den erbaren man Hildebrand Veckinchusen to Brucghe sal disse breff.
Minen wilghen deinst nu unde to allen tyden bereit an mynen leven vrunt Hildebrant Vockinchusen. Weten schole ghi, dat ic juwe breve wol vornomen hebbe also gy my schriven, dat gi my senden in schipper Noytte Stevenson 5 Hemborger tunnen engevers. Disse vorscreven schipper es, Got si ghelovet, myt leve wol overkomen unde dit gud en is noch nicht opgheschepet; wanner God gifft, dat et myt leve opkomet, so wil ic gerne dat beste darby doen myt alle mynen vormogen na utwysinghe juwer breve. Vort so wetet, dat hir de punttol wedder op is ghekomen unde men moet van dem ℔ gr. 1 sl. to puntgelde geven. Vort so wetet, dat hir aldus langhe gude losunghe hevet ghewesen van wande. De laken hir hedde ghehad over somer, de solde wol rede gelt hebben ghekofft. Ic wil ju hirnest wol alle tidinghe toscriven. Nicht mer dan blivet ghesunt myt Gode. Grotet alle vrund sere. Ghescreven 8 daghe na sunte Peter unde Pauwels dach 1411 in Danczeke.
57. Ludwig Buggendal in Danzig an Hildebrand Veckinchusen in Brügge. – 1411 Juli 12.
- Rev. St.-A. Orig. Adr.: An den erbaren man Hildebrand Vockinchusen to Brucghe kome dise breff detur.
Minen wilghen deinst unde wat ic gudes vermach an mynen leven vrund Hildebrand Vockinchusen. Weten sole ghi, dat ic juwe breve wol
Briefwechsel Hildebrand Veckinchusen, Seite 69. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_069.jpg&oldid=- (Version vom 31.7.2018)
