Seite:Briefwechsel Hildebrand Veckinchusen 078.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

littera detur. Darunter von H. V.’s Hand: 1411, 13 in november 50 ℔ gr. Offenbar sind beide Briefe gleichzeitig abgegangen.

Broderlyke leyve vorscreven leyve broder. Slyper es, ef Got wel, wol to Lu^onenborch und sal, ef Got wel, vor uns allen syn, est dat hey dar komen es my duncket Slyper muste darby, solde dey rekenscop eyn eynde nemen. Got voge aldync to den besten to ewycheyt amen. Item ic wel, ef Got wel, op sunte Mertyn by myme hern van Trere wesen umme Slypers vencknisse wyllen und hope met hern und vrunde hulppe, der sake eynen betern eynde to krygen und dat wy dat gelt nicht al solen dorven utgeven. Got geve beholden vard al umme.

Item ramet gy des besten in allen dyngen, also gy best kunnen, ic hebbe ok to Lubeke screven, dat men ju werk kopen sole met deme gelde und sendet hyr to Kolnne to; schu^ot dat so est my leyf. Scryvet gy al umme ju gudduncken und scryvet my al rekenscop und ju gudduncken und grotet myn suster und al vrunt. Ghescreven des su^onnavendes vor sunte Mertyne 1411 jar.

Zyverd Veckynchusen, Kolnne.

Item ju^owen breyf by Wyllem umme dey 50 ℔ gr. hebbe ic wol vornomen und ic gan ju dey 50 ℔ wol in broderlyker vruntscop und tru^owe wel, und my were let, dat gy icht tachter van my wern, ic kenne gy hebben vele daen und ic hebbe ok nicht cleyne ghedaen. Gy seryven welle ic 50 ℔ gr. nicht geven, dat ic dan van elken punt gr. geve 4 gr. Ic hebbe ummer nicht myn ghedaen by der selscop und by ju^owen dyngen und by … und by vrunden, dat uns ok beyden angenc dan my borde und kunde ic vele mer daer hebben, doe hedde ic gerne doen na al myn vormogen. Scryvet my al rekenscop clar und vaste to eynen eynde, wan dat scheyn und eyndyget es, so sole gy van den 50 ℔ gr. neyn nadegedynge holden hebben.

Scryvet to Lubeke und to Venedyen, dat gy neyn gelt mer betalen wellen met alle dat en sy dat men ju gelt by den wesselbreyve sende und ic sende Peters Karbow breyf to Lubeke ward, dar sol grot schaden opkomen op dey 2800 ducaten.

Item Slyper es, hope ic, wol to Lubeke und al dync sal, ef Got wel, al gud werden men wat ic doen wel by der Venedyesschen selscop, des kan ic nicht en scryven, er dey rekenscop scheyn es, dat wel also ghereyt nicht syn also gy meynen. Item by der Nowerschen und Pru^oschen reyse to blyven, dat blyvet al op dey rekenscop und ramet gy in allen dyngen des besten und begeren al rekenscop slecht to hebben also gy eyrst kunnen und to Lubeke to woenen, des gaen ic ju wol, woet ju nutte sy, men ic wel dar nicht er ic beter tydynge vorneme und rade ju ofte nemande eyn hus to kopen, er gy beter tydynge vornemen. Ic scref ju eyns wolde gy to Lubeke woenen, ic wolde ju hus und al dat ic dar hedde oplaten und hedde ju ok wol volget, dat es nu to spade. Got mach dat al umme noch wol

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 7. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_078.jpg&oldid=- (Version vom 31.7.2018)