Seite:Briefwechsel Hildebrand Veckinchusen 086.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

73. Ludwig Buggendal an Hildebrand Veckinchusen in Brügge. – 1412, März 23.

Rev. St.-A. Orig. Adr.: An Hildebrand Vockinchu^osen to Brugge detur littera

Vrentlike grote vorgescreven an mynen leven vrent. Hildebrant, dat ic ju^o sende op den engever, den ic vorkoft hebbe, in Tewes Ludekenssone 1 stro wasses, dar es inne 7 stu^ocke wasses, de wegen 17½ sten 5 punt unde 1 ferdendel. Elk sten statt erstes kopes 7 frd. unde 2 scot, summa es 32 mark 10 scot myn 6 ₰. Dyt was kostede to wegen 18 ₰, to besegelen 16, to beriven myt int schep 2 scot, to puntgelde 4 scot unde 10 ₰, summa in al 32 mark 3 frd. myn 22 ₰. Hir es harde beweringe ut, dat wet Got. Item Hildebrant, ik wil des besten gerne ramen by den engever na ju^owen briven, dar wil noch neimant an. Dat erste, dat Got gevet, dat dar eimant anwel, so wil ic darby doen ofte he myn were, des moge gi my wol geloven. Got late ju^o gesu^ont. Gescreven des mytweken vor palmen 1412.

Item wy hope hir to Gode, et solde schir vrede werden. Got gevet unde sin leve moder.

Lodewych Bucggendal.

74. Ludwig Buggendal an Hildebrand Veckinchusen in Brügge. – 1412 März 23.

Rev. St.-A. Orig. Adr.: An Hillebrant Foekinchusen to Brugge schal disse bref.

Int jar Christi 1412 des mytwokes vor palmen do sante ik Hillebrande hirop in Tewes Ludekensone 1 stro wasses, dar weren 7 stucke wasses inne, de woigen 17½ sten 5 punt unde 1 ferdendel; elk sten sto^eyt erstes kopes 7 ferd. unde 2 scot, summa to gelde 32 mark unde 10 scot myn 6 ₰. To ungelde hirop int erste to weghen 18 ₰, to besegelen 16 ₰, to beriven mit int schep 2½ scot, to puntgelde 4 scot 10 ₰, summa mit allem ungelde mit int schep 32 mark 3 frd. myn 22 ₰. Item wetz leve Hillebrant, dat ik juwen bref wol vornomen hebbe also gy my screven dat ik den enggevar scholde geven umme 6 mark, des en kan ik nicht don up desse tyt unde ik wil des besten hirbi ramen unde scrivet my juwen willen. Item wetet, dat der scult, de in de selschop hort, ju unde juwen broder unde my, dar en is my nicht mer af geworden noch tor tyt den 5 mark, de wil ik ju senden in kort unde wes dar wert vort in gemanet, dat wil ik uns holden to guder rekenschop. Item so seght men uns hir, dat wi solen enen guden steden vrede hebben. Ist sake, dat et vrede wert almen uns recht, so scholen de lakene wol gelt gelden up dat jar. Nicht mer up disse tyt, men blivet gesunt unde grotet alle vrunt sere.

By my Lodewich Buggendal.

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 15. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_086.jpg&oldid=- (Version vom 31.7.2018)