Seite:Briefwechsel Hildebrand Veckinchusen 093.jpg

aus Wikisource, der freien Quellensammlung
Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.
Wilhelm Stieda (Hrsg.): Briefwechsel Hildebrand Veckinchusen

80. Sivert Veckinchusen in Köln an Hildebrand Veckinchusen in Brügge. – 1412 Septbr. 28.

Rev. St.-A. Org. 2½ Bog. Pap. in Quart gefaltet und ein Zettelchen, alles mit einem Bindfaden zusammengehalten. Adr.: An Hyldebrand Veckynchuosen to Bruogge littera detur.

Broderlyke leyve vorscreven. Wetet dat ic juowe breyve wol vernomen hebbe und es my leyt ghenoch, dat ic nicht to huos was, doe gy und Bertram Herentrey und al ander unse vrund hyr wern umme vele sake wyllen, wand my lange na ju und andern vrunden vorlanget hadde. Und ic kan nicht van dessen wyntter by ju komen und sorge, ic mote op Kerstmysse[1] weder to Luonenborch met Karbowen. Wy kunden neyn eynde to Ausborch krygen, hey wolde uns nicht geven und al dync es an den rat van Luonenborch ghesand, Got geve uns dar eynen guden eynde. Wy hebben eynen bosen man under handen, dar wy sunder groten schaden nummer van scheden kunnen, Gode unbarmet. Ic wolde nicht gerne mer(!) dar mer dar und teyn noch ryden. Dey lande staen ovele und ic kome ut al myner nerynge und sy schuldych und weyt, woe ic ut der schult komen sal, Gode unbarmet, ic wel ju hyrnest wol mer van dessen saken scryven. Al gud dat in dey selscap hord, dat sy war dat sy, moet stylle lyggen unvorkoft, wand na Kerstmysse unvorkoft.

Item broder ic bydde ju, dat gy dey 400 cronen to dancke betalen, dey Arnd Wachendorp op ju wesselt hevet, wer et dat gy ummer neyn gelt hedden, so kopet op Hans van Mynden 40 ℔ gr., dey solen sey dar wol to Lubeke betalen; ic hebbet Tydemanne und Hans van Mynden screven, dat sal wol betalt werden, men nemet den dach also gy lengest kunnen. Item also gy my screven van den 25 ℔ 10 sl. gr., dey ju weder overkomen solden van Lubeke. Schege dat, so kopet dey weder over op Tydemanne und Hans van Mynden. Ic sy hyr also van Hans van Mynden scheden, dat dey 25½ ℔ gr. und ok dey 40 ℔ gr. wol betalt solen werden. Men leyte gy eynych gelt weder op my overkomen, dat were myn vorderf. Ic sy hyr doch mer dan 400 gulden schuoldych und wolde, dat ic schaden doen kunde umme gelt, ic moet noch 400 gulden hebben al, woe ic eme doe, alsolde my 1 ₰ 2 kosten.

Item ic scryve ju vele umme rekenscap und gy scryven my altyt weder, ic sole afslaen dat gelt van Hans von Mynden. Ic wel noch op noch ofslaen; ic hebbe ju rekenscap screven van al deme, dat wy send der tyt handelt hebben, send dat ic lest by ju was to Bruogge in selscap. Sy gy des nicht vroet, so wel ic dat noch gernne eyns scryven. Also scryvet my weder to eynen gantsen eynde, ic wel in myn rekenscap nicht schreven noch rekent hebben, dat in myn rekenscap nicht hord und ic nicht untfangen hebbe. Ic hebbet ju vele screven, war my dat an schelet al were wy wol by eyn, so mochte wy doch nicht afslaen, dat my nicht toqueme und nicht untfangen hedde.

  1. ↑ 25. Dezbr.
Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 22. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_093.jpg&oldid=- (Version vom 31.7.2018)
Von „https://de.wikisource.org/w/index.php?title=Seite:Briefwechsel_Hildebrand_Veckinchusen_093.jpg&oldid=3224448“