|
Wilhelm Stieda (Hrsg.): Briefwechsel Hildebrand Veckinchusen |
|
|
Item gy screven my eyns over eynen jare rekenscap und nemen ut unser selscap by 224 ℔ gr., also vele meynde gy, dat ic ju und in dey selscap schuoldych were und nu scryve gy, ic sy ju 100 und 10 ℔ 19 sl. gr., dar sole ic weder afslaen, wat Hans van Mynden rekenscap vorclaret, dat ju tokome. Ic weyt woe dat afslaen, hedde gy elk dync op dat syne screven und rekent und elk rekenscap bysunder screven, so mochte ic my darut untreyden. Ic hebbe ju vele screven, wat my unbreket, wolde gy dat afslaen und elk op dat sine reken, dat were my leyf. Hedde gy unse selscap bysunder laten staen und screven, so heddet lange slecht wesen.
Item my ghebreket, dat gy toscreven und afslagen hebben na mynen besten steyt in den andern breyve met kortten worden. My unbreket mer, dat welle wy wol slecht maken, wan gy my al rekenscap scryven. Schelt ju ok icht an myner rekenscap, dat scryvet my weder, dat wel ic gernne betern. Ic hadde dat mest al screven, er my ju breyf by Gerwyn quam. Item ic hebbe op dat was betalt 300 myn 5½ gulden Rynsch und gy solen 500 gulden betalen ofte darvor 400 cronen; so es dat was betalt.
Item van den brysylyenholtte es overal worden 350 gulden und 7½ Tornsche, des hebbe gy untfangen 13 gulden und 12½ sl. an gelde und ic hebbe vor dat was geven 300 myn 5½ gulden. Aldus beheylde ic van deme holtte 42½ gulden Rynsch. Gy mogen meynen, dat ic dat gelt van dem holtte in der ander mysse untfangen hedde, dat wolde ic met Wachendorppe Slyper wol wysen, dat et my nu eyrst ward. Sey maenden dat van myner wegen. Und uns es noch eyn, heyt Kuntze Budeler van Mentze by 50 gulden und hevet met uns und andern luden termyne maket in 10 jarn to betalen, darane hebbe wy dey 42½ gulden. Aldus steyt desse rekenscap van dem holtte.
Item also gy screven ic solde by ju komen, ic hope des sy neyn noet; ic hebbe in eynen jare nicht 16 weken to hus wesen und ic sorge ic moete tegen Kerstmyssen to Luneborch, darumme nemet dat nicht vor ovel, ic sy hyr nutter dan dar. Nemet Bertram Herentrey und Boekel to hulppe und doet dat beste al umme. Item also gy scryven van Tyten sy uns 2000 werk worden, dat were vele vorloren und grot eventuore staenden. Ic wyste gernne dey rekenscap darvon, salt al umme vorlus syn, so motet Gode unbarmen, ic hadde hopet wy solden dar daranne wonnen hebben. Tüte scref my van den 48 marc, dey hebbe gy ummer rekent.
Leyve broder latet ju der tyt nicht vordreten und scryvet my al dync clarlyken to eynen gantsen eynde, dat es nutte vor uns beyden und nemet dat nicht vor ovel, dat ic ju also vele scryve. Ic seget gernne gud und hedde gernne eyn eynde und latet uns nergen op dencken, er wy eyn eynde van al unser schult und rekenscap hebben und bestellet al umme dar wy gud hebben, dat wy dat in korden krygen. Al wat dat kostet, darna moge wy dan by eyn komen und dencken und raden, woe wy unse handelynge annemen wellen met allen dyngen.
Item gy scryven gy hebben 160 ℔ gr. vor dey selscap utgeven und hebben nicht vele in handen; ju es ummer vele gudes van Lubeke send komen: meckyn und ander gud, ic hope gy hebben ummer mer dan 200 ℔ gr.
: Briefwechsel Hildebrand Veckinchusen. Leipzig: S. Hirzel, 1921, Seite 23. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_094.jpg&oldid=- (Version vom 31.7.2018)
