|
Wilhelm Stieda (Hrsg.): Briefwechsel Hildebrand Veckinchusen |
|
|
selscap nomen 224 ℔ gr., dey scryvet dar weder in und lat uns seyn, woe gud unse selscap sy und war unse selscap sy, wey dan tachter sy van deme andern, dey neme dan mest af ut der selscap. War dey selscap nicht toreken kan, so geve, wey mest inhevet deme andern to und rekent al dync in dey rekenscap, dat wy send wy lest by eyn weren dat wynnynge ofte vorlust in dey rekenscap wand op desse tyt und latet uns al scryft doeden und slechten to eynen eynde, und latet darmede unser eyn dem andern vrolychen helppen, dat beste dat elk kan und hebbet guden moet dat sal, ef Got wel, al gud werden. Jo wy uns mer moegen und clagen, jo wy mer schaden hebben. Ic hope, dat sy op dem ergesten dat sal, ef Got wel, beter werden. Ramet gy dar des besten, also wel ic gernne hyr doen na al myner mocht.
Int jar 1412 jar op sunte Mychels avent scryve ic ju rekenscap van al deme dat ic van ju send untfangen hebbe dat ic lest by ju was to Brugge van unser selscap wegen also ic ju ok erscreven hebbe. Int eyrste untfangen, 1 tunne werx ut Lyflande, darvor ward blyvendes to Lubeke an Lubeschen gelde 700 und 8 marc Lub. Item untfenc lacke ut Vlandern, dey stont to Brugge 29 ℔ 5 sl. 6 gr. Hyrvan ward blyvendes to Lubeke 266 marc 5 sl. Lub. Item untfangen 1 tunne werx ut Prusen, darvan ward blyvendes 321 marc 7 sl. Item noch lacke met Wyllem Pattynenmaker, stond to Brugge 45 ℔ 4 sl. Lub.; darvan ward uns blyvendes 392 marc 10 sl. Lub. Item quemen ut Prusen 2 stucke wasses, wogen 2 scheppunt und 7½ lyspunt, darvan ward blyvendes 67 marc 11 sl. Lub. Item noch 3 quartyr anygen, darvor ward 39 marc. Item ut Steynhuses und unser selschap untfangen 80 marc myn 5 ₰, dey hebbe gy my nu propper affslagen. Item van Herman opme Orde to der kartuser behof 100 marc Lub. Item vor ½ wyt Eyngelsch laken ward 7 marc Lub. Item vor 4 last und 7 tunnen vygen, darvan ward blyvendes 92 marc 14 sl. 3 ₰. Item vor 50 balle ryses ward blyvendes 311 marc Lub. Item ut Tüten tunnen werx vorkoft 8000 schoen werx, summa net 430½ marc Lub. Item van Johan Crowel untfangen 20 ℔ gr. summa 125 marc Lub. Item Bertolt van der Oesten 10 ℔ gr. summe 62 marc 3 sl. Lub. Item noch 2 vate pepers, darvor ward blyvendes 227 marc 14 sl. 4 ₰. Item by Hoensteyne 1 terlync Tomasch laken, darvan ward blyvendes 194 marc 12 sl. 3 ₰. Item van Ryge 6 stucke wasses, te woch to Ryge 4 scheppunt 2 lyspunt, darvan ward blyvendes 128 marc und 4 sl. Item lacke stond to Brugge 56 punt 11 sl. gr., darvan ward blyvendes 500 unde 5 marc Lub. Summe van al untfangen tohope an Lubeschen gelde 4060[1] marc und 8 sl. 10 ₰ Lub.
Hyrop weder utgeven int eyrste sand to Lyflande ward 50 nobelen, standen 100 marc 25 sl. Lub. Item betalt 46 ℔ 12 sl. 11 gr. an paymentte, dat myn broder op my overkofte, ic gaf vor elk ℔ gr. 6 marc 6 ₰ summe 281 marc 6 sl. Lub. Item in dey Venedyesch selscap leget 606 marc 10 sl. 8 den. Item sand mynen broder bly op 45 marc. Item sand to der Pernowe an lowande op 9 marc Lub. Item noch in dey Venedyesch selscap leget
- ↑ Die Zahlzeichen undeutlich. Die Addition ergibt einen andern Betrag.
: Briefwechsel Hildebrand Veckinchusen. Leipzig: S. Hirzel, 1921, Seite 25. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_096.jpg&oldid=- (Version vom 31.7.2018)
