Seite:Briefwechsel Hildebrand Veckinchusen 103.jpg

	Wilhelm Stieda (Hrsg.): Briefwechsel Hildebrand Veckinchusen

Item synt dar 50 Arasche vorlorn, dat es quat, dat wy al umme vorleysen solen, Got betert al umme.

Item ic ryde to Lunenborch in den namen Godes und hope, dat sole to den besten komen umme vele sake wyllen, ok es Peter Karbow dar, dar mochte wy eynen eynde mede krygen und ic blyve hyr schuldych by 300 gulden, kan men hyrnest nicht bet, so moet Lyseke dey opnemen, wand ic hebbe Slyper moten leynen 200 gulden dey hevet hey in dey selscop utgeven und kan my der nicht wedergeven, kunde gy dar also vele van den gronen eyngever und brysylyeholtte vorkopen, dat gy dey 200 gulden afnemen op dat brysylyenholt, dat gy my sanden, doch hebbe ic dat holt nergen na al vorkoft umme reyde gelt, men blyvet my darvan schuldych op dey ander mysse by 200 gulden. Und hyr leget 40 punt unvorkoft, dat blyvet hyr lyggen und es to cleyne to Bergen to senden.

Item das holtt was overal an Francvorder wychte 333 punt und ic hebbe dyt holt al vorkoft op 40 punt na, dat reken ic elk punt op 1 Rynschen gulden, wan dat also vele gulde, so were vor dat holt worden wan al schult betalt worde 356 gulden Rynsch; des hebbe ic vor dat holt utgeven to vore wand to Francvord 3 gulden und van Bru^ogge wand to Kolnne 3 Rynsche gulden. Aldus moge gy dey rekenscop op dat holt scryven op 350 gulden, gelden dey 40 punt myn ofte mer, dat vynden wy wel.

Van dessen holt es eyn borger bynnen Kolnne schuldych, heyt Johan van den Bu^osche op dey hervest myssen to betalen 120 gulden. Item es eyn schuldych, heyt Kuntze Bu^odeler to Mentze 43 gulden ok op dey ander mysse to betalen und hyr leget 40 punt holtz unvorkoft. Item my steyt noch mer in schulden van dessen holtte dat reken ic op my; aldus hebbe ic reydes geldes untfangen overal 143 gulden. Des sole gy van den wasgelde ju toreken 13 gulden und 12½ wyt ₰ Kolsch op rekenscop van den holtte, kunde gy van der selscop gude my toscryven 200 gulden, dey nemet op dat brysylenholt vor 5 gulden 4 cronen. Slyper segede dat ic dey 200 gulden op ju overkofte; und vorkopet wat gy hebben van der selscop wegen al, woe gy dat geven; al spysserye sal myn gelden.

Item ic hope uns sole vor der hervest mysse unse gelt den mesten del ut der selscop werden, Got geve met leyve to leven, so salt noch, ef Got wel, al gud werden. Scryvet my al ju gudduncken to Lunenborch in Clawes Gronhagens hus und my du^ochte gud, dat wy Boden syn gelt nicht al geven, er wy met Peter eyn eynde hebben, ok hebbe ic Johan van der Bruggen schult bevolen intomanen by 400 marc, wat darvan inkomet, dat sal hey Tomas Veckynchusen geven an syn gelt. Ic wel, ef Got wel, vele dynges slecht maken to Lu^onenborch und scryven ju dan al dync also ic best kan. Item gy scryven van deme gelde van Hans Mynden, dat sole ic afslaen, des kan ic nicht afslaen, hebbe gy my dat torekent so rekent my dat ok weder af, dat duncket my dat meste recht syn. Ic hebbe ju vele screven, woe und wat my daran schelde, dat was nicht allene Hans gelt van Mynden, dar schelde ok Pru^osch gelt ane.

Gy scryven ic were ju schuldych 864 marc 11½ sl. Lub. Darop scref ic ju weder by mynen lesten, dat my darane schelde an Johan van der

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 32. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_103.jpg&oldid=- (Version vom 31.7.2018)