|
Wilhelm Stieda (Hrsg.): Briefwechsel Hildebrand Veckinchusen |
|
|
by den 10 jar lanch, dar hey doch enen anderen puntghelt van solde gheven hebben, so meynne ick, dat ick so wol puntghelt eyghe also ein vrommet man. Aldus so slach ick hiraf to puntghelde 40 gr. Ick holdet darvorn, dat et wol so velle kommen sal also vorscreven es unde hope des to Gode, dat gy my des nicht weygheren ein wellen.
Aldus so solde gy by my beholden dey summa van 400 ℔ gr. myn 17 gr. 2 esterl.
Item vrouwe unde swagher ju beyden gheleyve to wetende, dat ick ju ghesant hebbe op desse vorscrevene summe gheldes ton ersten in schepper Vrederyk Roleffessonne 300 soltes, dey stonden myt der halver vrucht 41 ℔ 8 sl. 6 gr.
Item 1412, 26 in merte, do sante ick ju to Revelle wort in Arnt van Hasselte 2 terlinghe, dar weren inne 28 Tomasche laken, desse laken stonden myt heller vrucht 58 ℔ 7 sl. 8 gr.
Item so gheleyve ju to weten vrouwe unde swagher, dat ick ju to Dansseke hirop betalde by Tydeken Swarten 50 ℔ gr. to 3 marc 18 scot.
Item op sunte Johannes avent to myddensommer,[1] do sante ick ju to der Ryghe wart in Evert Bornnehoyff 200 saltes, dey stonden myt halver vrucht 23 ℔ 7 sl. gr.
Item so sante ick darnest ju in Scheper Nyenborghe 100 soltes dat stont 9 ℔ 13 sl. 4 gr.
Item so sante ick in Johann Allerssonne 1 tunne myt crude unde ander dynch, dey stont 4 ℔ 9 sl. 2 gr. Item so was noch in der tunne 2 benchlaken unde 3 par hosen, ½ sardok, dyt stont tohope 2 ℔ 15 sl. 1 gr. Item so sante ick ju darnest to Prusen wart 1 tunne myt 2 scharlaken, dey stonden 16 ℔ 4 sl. 10 gr. Item so sante ick ju by Kolhassen crude op 33 sl. 7 gr. Item so reckenne ick hirto dat ick tovorn tachter was also dey summa van 7 ℔ 11 gr. Item so sante ick ju by Heynneman van den Bornne op Stoven 2 terlinge, dar was inne 28 Tomasche laken, dey stonden 61 ℔ 6 sl. 4 gr. Aldus so es dey summe tohope dat ick ju ghesant hebbe unde overkoft in Prusen 276 ℔ 6 sl. 5 gr.
Item so gheleyve ju vort to weten swagher unde vrouwe, dat ick desse summe gheldes afsla an der vorscrevenen summe gheldes, aldus so behelde gy do by my noch 123 ℔ 12 sl. 1 est. Vrouwe unde swagher, so nemme ick van desser summe gheldes dey 100 marc Ryghes, dey myn her gaf, des God ghenedych sy in synen testemente myr dochter Trudeken. Dey 100 marc rekenne ick in den tyden, do hey starf myn here, op 33 ℔ 6 sl. 8 gr. Item vrouwe unde swagher, so gheleyve ju vort to wetende also umme dey 100 marc Ryghes, dey Johannes Essebach juwer dochter Greteken ghegeven hadde, er sey myn wyf wart, dey 100 marc worden my clarlyken toghezeghet to gheven, er ick enich volbort to juwer dochter wolde gheven to wyve to nemmen myt mer noden[2] dey dar vellen, also des her Kort Vysch lychte wol ein dels vordenken mach, dey 100 marc Ryghes, dey weren in den tyden wert na golt talle unde by punt groten an Vlameschen ghelde 44 ℔ 19 sl.
: Briefwechsel Hildebrand Veckinchusen. Leipzig: S. Hirzel, 1921, Seite 56. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_127.jpg&oldid=- (Version vom 31.7.2018)
