|
Wilhelm Stieda (Hrsg.): Briefwechsel Hildebrand Veckinchusen |
|
|
Hir scrivet my en antworde van met den ersten, wor ic my to vorlaten mach anders nicht dan. Blivet ghesunt in Gode unde grotet alle vrunt zere unde scrivet my jo tydinghe wat dat gut in Vlanderen doet unde ok vlas unde hanp. Ghescreven des mandaghes na sunte Mychele 1415.
Item so gevet Reinolt Swarten 4 Enghelsche nobelen, de sy ic sinen broder schuldich.
109. Tideman Brekelvelde an Hildebrand Vechinhusen in Brügge. – 1415 Nov. 2.
- Rev. St.-A. Adr.: An Hildebrand Veckinchusen to Brugge littera detur.
Vruntlike grote unde wes ik gudes vormach. Hildebrant, gude vrunt, ju gheleve to wetene, dat ik Riicherde van der Linden juwen breff laes, alse gy my ghescreven hadden unde he claghede my to male sere, dat gy ene unde ju an den 2 noblen vorsumet hebben, de he Lodewige van den Eyken to juwer behoff gheantwort hadde unde gy hebben ghescreven van 8 ellen des wetet, dat he sin recht dar to don wel, dat es nicht mer dan 6 ellen wesen en sal. He seghede my to male vele, wo he ju unde juwen broder in werlde vrunt ghewest hedde unde en hedde nicht ghemeint, dat gy em also solden toscreven hebben. Hildebrant, mit korte ik hadde vele wort mit eme, also dat ik et so verne mit eme bracht hebbe, dat he ju noch 2 Enghelsche nobel geven wel. Doch vor de 2 nobelen hebbe ik eme secht, dat he ju 5 mark Lub. geven sal, so wert ju 3 sl. Lub. mer dan 2 nobele alse verne alse gy wellen. Seker Hildebrant, op dat et ju gelevet, so nemet 5 mark unde latet ene quiit. Weret my so gheleghen, ik neme 5 mark unde leitet gut wesen, wante men en kan alsolk dink nicht al op rapen. Wes juwe wille hirinne is, dat scrivet my.
Item, Hildebrant, ik hebbe wol vornomen, wo de 54 centener koppers in dat Swen ghekomen weren. Ik hope 76 sin dar, off Got wel, ok ghekomen. So bidde ik ju, dat gy wol don unde vorkopen koper unde werk, dat my wat gheldes werde, unde don darby alse gy dat van my nemen wolden. Gy weten wol, wo alle dink stet. Hirmede blivet ghesunt. Ghescreven 2. die in november anno 15. Item ik wet wol, dat ik vuste ghelt tachter sy dat wete gy ok wol.
Item, Hildebrant, dat erste dat my de oghen wat bet to rehe werden, so wel ik ju dan all dink uterliken scriven. Item ik en hebbe van deme tymeane ut Prutzen noch nicht vornomen, off he vorkofft sy off nicht. Item juwe witte laken en is noch nicht vorkofft. Ik wolde wol dat et vorkofft were. Item ik hebbe ju van al anderen dinggen in anderen breven ghescreven.
: Briefwechsel Hildebrand Veckinchusen. Leipzig: S. Hirzel, 1921, Seite 62. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_133.jpg&oldid=- (Version vom 31.7.2018)
