Seite:Briefwechsel Hildebrand Veckinchusen 147.jpg

Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

	Wilhelm Stieda (Hrsg.): Briefwechsel Hildebrand Veckinchusen

dey in dey selscap scryven, elk op dat syne, so kunne gy daran nicht vele wynnen noch vorleysen. Vynde gy dat in der eynen rekenscap nicht, so vynde gy dat in der ander rekenscap wol, dat wy, ef Got wel, nergen an reyssen wellen noch twedrachtych over werden wellen, woe gy dat recht scryven wellen und ic sende ju^owen breyf weder, dar vynde gy cru^ose boven, war my wat an schelet.

Item ofte gy dey rekenscap van den brysylyenholtte vorgeten hebben, so est dyt dey rekenscap noch eyns. Van den brysylyenholtte ward blyvendes 350 gulden und 7½ Tornsche, darvan gaf ic vor dat was to Francvord 300 myn 5½ gulden. Und ic scref ju, dat gy van paymente solden opboren op dat brysylyenholt 13 gulden und 12½ sl. an gelde. Aldus blef ic doe der selscap van dessen brysylyenholtte schuldych over al 42½ gulden Rynsch, des was men my darvan schuldych by 50 gulden quader schult, dat hebbe ic al mest inghemaent, dar werd 2½ gulden an vorloren, aldus sy ic der selscap schuldych 40 gulden, dey scryvet op my by dey 345 marc 2 sl. 2 ₰, aldus wete gy den eynde van den brysylyenholte.

Zyverd Veckingchusen rekenscap van der selscap wegen.

Item broder aldus vele sy ic unser beyder selscap schuldych also ic ju ok erscreven hebbe, dat Lyseke mer untfangen dan utgeven hadde dey 18 marc Prusch afslagen, dey gy screven an Lyseken, dat sey dey Tydeman Brekelvelden geven solde, darvor gaf sey 36 marc 10 sl. doe blef ic der selscap noch schuldych 129 marc 10 sl. 2 ₰. Item so blef ic noch der selscap vor 24 marc Prusch, dey ic in Pru^osen untfenc 50 marc Lub. Item noch gaf Hans van Mynden van unser selscap gelde vor my ut Gerd Salmesteyne 216 marc, summe van al dat ic der selscap schuldych sy vorscreven over al tohope 375 marc 10 sl. 2 den Lub.

Hyrvan gaf ic Tomas Veckynchusen to Lubeke van mynen egen gelde by Johan van der Bruggen 26½ marc Lub. Item segget Tomas, dat ic vor synen broder Hyldebrande utgeven, dat hey hadde an cledern und schoen und schole gaen sunder al kost, dat my Hans van Mynden van syner wegen rekende 11½ marc Lub. Item heft my nu Tomas screven van Ryge, dat hey noch van myner wegen inne hevet 12½ marc, dey slet hey my ok af an deme gelde, dat wy em schuldych weren. Summe van al, dat ic Tomas geven und betalt hebbe, also vorscreven es 50½ marc Lub., dyt rekent aldus met Tomas, darmede sal hey al betalt wesen, also syn rekenscap utwyset, men in syner rekenscap heft hey 11½ marc nicht van synes broders Hyldebrandes wegen. Item afslagen desse 50½ marc an den 395 marc 10 sl. 2 den, so were ic der selscap noch schuldych 345 marc 2 sl. 2 den. und ic sy noch ungelt tachter, dat late ic staen des es nicht alto vele, wan wy also na eyns syn, so vynd syk dat wol; mer sy ic der selscap nicht schuldych altyt to guder rekenscap und meyne, men solt anders nicht vynden by mynen besten, al solde ic ok sterven, doch solt syn to guder rekenscap op ju vorbetern. Item wan gy den eynde nu weten, wat gy der selscap schuldych syn, so vynde gy dyt by my also vorscreven es 345 marc 2 sl. 2 den. und darto 40 gulden van dem brysylyenholtte.

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 76. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_147.jpg&oldid=- (Version vom 31.7.2018)