Seite:Briefwechsel Hildebrand Veckinchusen 172.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

so sin de 20 ℔ syden nu to Hamborghe ghekomen unde ok de 7 Arrasch aldus hebbe ik vornomen. Mer ik en vorneme noch nicht van den 2 mutzen, de ju Borstal ghedan hadde, off se ok to Hamborghe sin, off nicht. Sunderlinge en wet ik ju nicht to scriven, men dat ik ju bidde, dat gy wol don unde ramen in allen dinggen des besten mit syden to kopene unde ok mit andern dinggen mede wante nademe alse ik vorneme, so en iz et noch nein vrede mit den Nowerders. Hirmede blivet ghesunt. Ghescreven op sunte Philippi et Jacobi dach anno 17.

Tijdeman Brekelvelde.

Item, Hildebrant, alse ik dallink vornomen hebbe, so dunket my, dat et noch ter tijt nein vrede mit den Nowerders wesen en welle, alse ju vrunde wol berichten solen, de nu to ju komen etc. Ramet in allen dinghen des besten, lik alse gy van my begheren wolden. Dunket ju, dat gy profijt don kunnen van gude herwarders to sendene, so wel ik gerne dat eventur mede stan; mer dat scrivet my umer mit den ersten. Item Ludeke Detmers is noch in der Wisel.

153. Hildebrand van dem Bokel (in Reval) an Hildebrand Veckinchusen in Brügge. – 1417 Mai 5.

Rev. St-A. Orig. Adr.: An Hildebrand Veckinchusen tho Brucge sal dusse breff.

Minen wilgen deinst unde wes ik gudes vormach. Wetet, leve oem. Hildebrand Veckinchusen, dat ik Lubbert Travelmanne wol vornoget hebbe van juwer wegen de 200 mark unde 17½ mark und 9 ore. Item so wetet, dat ik Johannes Woesten hebbe gheleveryret van juwer wegen 8 leste Lissebons soltes myn 41 lispunt. Item so hebbe ik noch vorkofft juwe 6 Tomasche slachdoke, elk lake golt 8 mark Ryg. unde 10 ore. Item noch vorkofft juwe 6 Mestensche, elk laken vor 5 mark unde 1 fr.

Item so hebbe ik noch untfangen ut Prussen van juwer weghen 10½ last soltes unde 4 schippunt unde 4 lispunt, des hebbe ik eyn del to Dorpte vorkofft, alzo 4 leste unde 2 secke to 12 marken elke last, unde 1½ last to 14 marken de last, unde en del licht es noch op dem weghe unde en del hebbe ik es ok nu to der Narwe wart ghesand. Dit hebbe ik unsem neven Hildebrande Veckinchusen bevolen to vorkopen. Ik en kan ju dar geyne rekenscap van ghescriven er et al vorkofft is, et hedde lange al vorkofft ghewest, heddet eynich winter ghewesen. Item so steit dat stuveken unde dat Arras noch unvorkofft. Item so wil ik juwe vigen myt dem ersten to der Narwe wart senden, dar is aff vorkofft 9 tunnen, elke tunne vor 6 fr. unde Hildebrand sal se to Pleskouwe wart voren. Item so sole ghi krancke bate hebben van dem solte, dat ut Prussen quam, wante ik hebbe darvan ghegeven to vracht unde to wynnegelde 15 mark Rig 9 ore unde 1 artig; darto hevet de junghe Cleys van Egeren ok vu^oste gelt utghegeven to Ung(aren), dat he wedder to Brucghe an sinen omen ghescreven hevet, alzo ju alrede wol witlik mach wesen. Item so hebbe ik sorge, dat et van dessem somer myt den Russen neyn vrede en sole werden, so sal dat solt myt alle

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 172. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_172.jpg&oldid=- (Version vom 31.7.2018)