|
Wilhelm Stieda (Hrsg.): Briefwechsel Hildebrand Veckinchusen |
|
|
to betalene op sunte Michel[1]. Gy scriven to vorkopene ume rede ghelt, dat en stet nicht to donde. Hir sin noch 18, 6 rode, 6 grone, 2 bla, 2 naghelvarwe unde 2 swarte. Ik wel gerne des besten ramen, doch de tijt is drade ute. Ik en wet ju op desse tijt anders nicht to scriven dan blivet ghesunt. Ghescreven 21 dach in maio anno 17.
Item, Hildebrant, de andern 18 Arraschen sin ok vorkofft to 5 mark min 6 sl. unde dar wert Greteken van 40 mark redes gheldes, dat ander op Michel.
157. Tideman Brekelvelde (in Lübeck) an Hildebrand Veckinchusen in Brügge. – 1417 Mai 31.
- Rev. St.-A. Orig. Adr.: An Hildebrand Veckinchusen to Brugge littera detur.
Vruntlike grote tovorne screven. Wetet, Hildebrand, dat wy de 15 Arrasche vorkofft hebben, dat stucke vor 5 mark min 6 sl. Darvan hevet Margreyte entfanggen 40 mark, dat ander is to betalene op sunte Michel. Item so spreken my de lude erghisteren van den 60 ℔ groten unde beden my, dat ik wol dede unde makede dat ghelt nu rede in desser tokomende wecken, dat ik quat to donde hebbe, wante dat was, dat ik entfanghen hebbe ut Ludeken Detmers unde ut Hinrik Zerentine dat stet hir noch unvorkofft. Ik mochte, dat ut Ludeken quam, ghegeven hebben, er de Revelsche schippe quemen, dat schippunt vor 19½ mark, nu welt boven 19 mark nicht ghelden. Doch ik wel des besten ramen. Item alse my Gherwin Marschede screven hevet, so hevet he noch herwardes ghesant in Johan Snider unde in Bertolt Honover 2 stro wasses, de stan 100 unde 72 mark und 9 schot 13 ₰. Item noch in Johan Snider 1 stucke, dat stet 99 mark 14 sl. Item noch in Johan Sniders kisten 2 stucke sulvers, de stan 62 mark 10½ sl. Hedde wy dit vorschreven was unde sulver al hir unde dat et dan al vorkofft were, so wolde wy eme wol don. Doch ik wel des besten ramen. Ik hope to Gode, dat gy binnen kort hir wesen solen. Item ik en hebbe langhe wile neine syden vorkofft unde ok so en wert my nein ghelt van den vrowen, wante se en vorkopen nicht. Anders nicht dan alle juwe ghesinde is wol to punten, besunder Hildebrant, de is in deme munde seer. Got de sy mit ju. Ghescreven des mandaghes to pinxsten anno 17.
158. Tideman Brekelvelde (in Lübeck) an Hildebrand Veckinchusen in Brügge. – 1417 Juni 8.
- Rev. St.-A. Orig. Adr.: An Hildebrand Veckinchusen to Brugge littera detur. In dorso von der Hand des Empfängers: 1417, op sunte Peters unde Pawels avent[2].
: Briefwechsel Hildebrand Veckinchusen. Leipzig: S. Hirzel, 1921, Seite 176. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_176.jpg&oldid=- (Version vom 31.7.2018)
