|
Wilhelm Stieda (Hrsg.): Briefwechsel Hildebrand Veckinchusen |
|
|
unde werke dar en kan ik ju nicht van scriven, wante dar en is hir nein kop van. Ik en wet in al Lubeke nicht 1000 schonswerkes to kope.
Item, Hildebrant, alse ik ghisteren vornam, so sin de 2 scheppe op de Elve ut dem Swene komen, unse leve Here, de sy ghelovet, beholdener vart. Unde ik wel gerne des besten ramen by juwen dingghen unde ok by der syden alse de herkomet unde ik wel de op dat nyet scriven. Mer, Hildebrant, alse ik ju er ghescreven hebbe, so scrive ik ju noch, dat gy affkorten dat ghelt, dat wy in Prutzen hadden van deme scharlaken unde van deme tymeane an deme ghelde, des gy tachter sin van unser beder wegene, alse gy in der rekenscop ghescreven hebben. Wante gy hebbent my ghescreven, dat gy et op ju nemen wolden, darume so scrive ik alle paijement op juwe dink, wes ik van juwer wegene betale. Alse gy, off Got wel, herkomen, so welle wy alle dink wol suverliken reken unde slechten na juven willen. Unde ik bidde ju, dat gy wol don unde wesen darna, dat uns noch wat mer syde kome. Anders nicht op desse tiit dan al juwe ghesinde is wol toreke. Darmede sijt Gode bevolen. Ghescreven op sunte Egidij dach anno 17.
Item ik hebbe Hinrik Seilhorn unde Sander Hop elken 20 ℔ groten wol vornoeghet.
174. Tideman Brekelvelde (in Lübeck) an Hildebrand Veckinchusen in Brügge. – 1417 Sept. 3.
- Rev. St.-A. Orig. Adr.: An Hildebrant Veckinchusen to Brugge littera detur.
Vruntlike grote tovorne screven. Hildebrant, gude vrunt, ju gheleve to wetene, dat ik juwe breve vuste al wol vornomen hebbe unde my quam dallink 1 breff van ju, de was ghescreven 21 daghe in augusto, dar scrive gy inne, wo de Enghelschen mit der macht in Vrancrike sy. De leve Got voghet also alz et nutte sy vor uns altomale.
Item alse gy scriven ume stockvisch, des en is hir mit alle nicht unde ik meine alse her nu wat komet, dat dan ok dar komen sole. Darumme so en vorlatet ju dar nicht op. Item alse gy ok scriven ume werk unde ume was to kopene, des wetet, dat ik in al Lubeke nicht 1000 schonswerkes to kope en wet. Hir en is ok nicht vele wasses, de et vorghadert by schippunde, de kopet dat ume 18 mark unde ok en luttik min. Mer ik meine, dat hir schippe komen solen binnen kort van Rijghe unde van Revele, dar meine ik, dat vuste werk unde was mede komen sole. Iz et, dat ik dan wat opkomen kan, so wel ik gerne des besten ramen. Item, Hildebrant, ik hebbe ju vuste op alle juwe breve antworde ghescreven unde ok minen willen, darume so en wet ik ju nu sunderlinge to screven dan blivet ghesunt unde ik wolde wol, dat gy ju herwardes makeden ume vele sake willen, der ik nicht al scriven en kan. Ghescreven 3 daghe in september anno 17.
: Briefwechsel Hildebrand Veckinchusen. Leipzig: S. Hirzel, 1921, Seite 121. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_192.jpg&oldid=- (Version vom 31.7.2018)
