Seite:Briefwechsel Hildebrand Veckinchusen 214.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

to kloster senden unde ic hebbe Ryxzen al myn gudduneken screven unde ic wel, dat men sey erlyken utrychte unde en eyn del na der wyse late maken unde doch nicht alto vele. Unde sey hebben gude cledynge, dey mogen sey eyrst wol vorslyten unde ic wet noch nicht wan ic wol dar ward kome, wand ic kan ovele van schulde wegen van hyr komen unde ic dede gerne schaden unde kan to neynen schaden komen. Item met Everd Moleken were gud eyn eynde ghegaen unde dar du^ochten my gude wege mochte, men en met redelycheyt afleggen, unde ic wel, ef Got wel, komen also ic eyrst kan. Ic hebbe Ryxzen screven, dat sey al der kynder dync sal to syk nemen unde dat wol laten vorwaren; unde ic wel dar, ef Got wel, in kord mer senden unde ic bydde ju, dat gy unde myn suster in al des besten helppen ramen unde grotet al vrunt. Ghescreven 3 dage na sunte Gallen dage anno 18 jar.

Zyverd Veckynchusen, Kolnne.

Item ic bydde ju vruntlyken, dat gy met selygen Lyseken vrunden jo vryntlyc holden unde dat sey syk myner nicht beklagen, darvan unde al dync erlyc utrychtet unde betalt werde also ic ju ok er screven hebbe.

191. Sivert Veckinchusen aus Köln an seinen Bruder Hildebrand Veckinchusen in Lübeck. – 1418 Octbr. 27.

Rev. St.-A. Orig. Pap. Adr.: An Hyldebrand Veckynchusen to Lubeke littera detur.

Broderlyke leyve vorscreven, wetet, dat juwe 6 stucke vysches und 1 tunneken wol hyr komen es und my dunket, dat et hyr nicht wol van der hand wel. Sey wellen vor den rakelvysch nicht 28 gulden geven und vor den lotvysch nicht 35 gulden geven und dat werk wel nicht 80 gulden reyt gelt gelden und hyr es neyn reyt gelt von neynen gude to krygen und gy hebben den vysch to du^ore koft na dem also gy scryven. Ic hebbe op dessen dach 2000 schonwerx vorborget op dey vastmysse, dat 1000 vor 87 gulden. Ic hebbet hyr staende had send lange in dem sommer. Hyr es neyn gud to vorkopen umme reyt gelt. Ic heddet gerne to 80 gulden reyt gelt gegeven, wand ic kan to neynen gelde komen und wet nicht, woe ic van schult wegen van hyr to Lubeke ward komen sol. Unde ic besorge my noch, dat ic hyr blyven mot dessen wynter over und dat my doch leyt syn solde und ok vele schaden und achterdel inbrengen mochte, wand ic were to male gerne to Lubeke umme vele sake wyllen, doch ic wel noch myn beste doen. Ic was myn levedage ny also hoge bedrenget umme gelt und ic en wet nicht wol, woe ic van henne komen sal. Got helpe uns al umme ut aller noet. Grotet al vrunt. Ghescreven op sunte Symon und Judea avent anno 18 jar.

Zyverd Veckynchusen, Kolnen.

Ic wel ju dey rose^[1] senden met den vormanne also gy my scriven.

↑ Korb?

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 214. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_214.jpg&oldid=- (Version vom 31.7.2018)

[1] Korb?

[1]