Seite:Briefwechsel Hildebrand Veckinchusen 231.jpg

aus Wikisource, der freien Quellensammlung
Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

Vruntlike grote vorgescreven an mynen leven vruent Hildebrant Veckinchusen, weten sole gy, dat ik hir opgenomen hebbe van Hinryk Slechter 81 marc 1 frd.[WS 1], darvor sole gy gheven to Bruegge 14 dage na juewen ersten breyven 10 ℔ gr. nyes geldes. Ik bidde jue vruentliken, dat gi dyt gelt to dancke untrychten wyllen, wante ik hebbet jue aldues lange gerne gelent; my stet noch ute van juewen laken by 100 marc. Ofte gy des nicht loven wolden, so mach ic it wol bewysen. Were my dat gelt nue geworden, ik en hedde dyt gelt noch nicht op jue gekoft. Ik hedde jue gelent myt dat gi hir wat gesant hedden, dat ik van betalt wer worden. Men ik konde nue nicht vort mer, wan ik al betalt werde van juewer wegen, so sole gi noch by my beholden by 20 marc ein cleine myn ofte mer. Ik wil jue de rekenscap hirnest wol scryven, hir moge gy jue na rychten; dat halve unbesegelde Leydisch laken es my noch nicht betalt. Es wolde dat ik es wys were over 1 jare, vortmer gi scryven my, dat ik jue alle tydinge sole scryven, ik en wet jue neyne tydinge to scryven, dar vordel an es. Men kopet hir laken beters kop den men in Vlandern mach doen unde laken nicht allene, besunder ok ander guet gude. Herentaler gelden hir aldues lange by 23½ marc tom hogesten, de werden nue myn gelden; Dollermundessche gelden hir 12½ marc; Kuemesche 14 marc; Mestensche by 11 marc; Alstedesche 17 marc unde neyne losinge; myddel Buessche[1] 16 marc dat par; Kondytsche 5 marc; Gertbergesche 9 marc myn 1 frd.; Leydesche, Amsterdamesche 16 marc myn 8 sch. dat stucke. Ryx noch mandelen vygen en wellen myt alle nicht gelden. Got sy met jue. Gescreven 3½ weken na Paschen 1419.

Gerwin Marschede.

Gosschalk Krouwel sal de 10 ℔ hebben.


208. Quittung des Hildebrand Veckinchusen über den Empfang von 600 Rheinischen Gulden. – 1419 Mai 13.

Rev. St.-A. Orig. Pap. Das Siegel ist abgefallen.

Witlick zy allen luden, de dessen breyff sullen seyn offt horen lesen, dat ick Hillebrand Fockinghusen hebbe gekofft unde wol to willen untfangen van Henrick Kollert unde Roeloff de Bruone zeeshondert averlensche Rynsche guldene an guedem paymente, de welke vorscrevene somme gheldes love ick to betalne bynnen Mens em selven offt ere erffnaemen by my offte by mynen erffnaemen up sunte Johans dach naest toekomende sonder langer vertogheren unde wert sake, dat danne de vorscrevene somme gheldes nicht betalt en worde, dat God verbeden moete, zo wat hindernessen kost offte schaden dat darna de vorscrevenen Hinrick Kollert unde Roeloff de Bruone umme der betalinge wille leden offte nemen, dat love ick Hillebrand vorscreven em selven offte den brengere desses breyffs wol to betalne unde guet to doene met deme rechten hovetstole sonder arghelyst. Unde des to eynen tughe der warheyt, zo hebbe ick Hillebrand vorscreven myn ingesegel

  1. ↑ Middelburg?

Anmerkungen (Wikisource)

  1. ↑ Vorlage: frp. Korrigiert nach Berichtigungen
Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 231. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_231.jpg&oldid=- (Version vom 31.7.2018)
Von „https://de.wikisource.org/w/index.php?title=Seite:Briefwechsel_Hildebrand_Veckinchusen_231.jpg&oldid=3224584“