|
Wilhelm Stieda (Hrsg.): Briefwechsel Hildebrand Veckinchusen |
|
|
wetet, dat ik de lude hir nue betalen mot, of se wolden dat gelt sulven overkopen spreken to male quat. Alduez so wetet, dat ik hir upgenomen hebbe van Jacob Molner dat gelt vor 30 ℔ groten nye gelt, dar sal he my geven vor elk ℔ 7 mark Lubisch myn 4 sl. Desse 30 ℔ groten dot wol und untrichtet to danke Willem van Kalven 4 weken na sycht dessen breven und untrichtet eme jo to danke, dez bidde ik jue denstliken, dat dar nene klage van en komen of schade. Hadde ik et kunnen betern so enhadde ik nen gelt up jue gekoft, men de Schonewender wern so queat und manden my so ovele, dat ik ez my schemede und des gelykez ok Ludeke van der Heyde.
Item wetet, dat my duenket in juwen bruder breven, dat he noch ter hast hir nicht enkomet, do he wet dat alderbest.
Item so dot jue myn vruwe sere groten und al de kynder, se sint al wol gesunt.
Item segget Tydeman Swarten, dat ik alle gelt wol to danke betalt hebbe, dat he up my gekoft hadde und dat he jo nen gelt mer up my enkope nach der tyd, wente ik sal hir tomale vele geldez utgheven to dessem pinxten. Hirmede spare jue God gesund to langer tyd. Geschreven up den sonavent vor der kruesseweken anno 19.
211. Hildebrand Veckinchusen in Brügge an seine Frau Margarethe in Lübeck. – 1419 Mai 21.
- Rev. St.-A. Orig. Pap. Adr.: An Margreten Veckinchusen to Lubeke lyttera
detur.
Vrentlyke grote vorghescreven Greteke leyve wyf; wete, dat ick hebbe scheppet 5 terling to Lubeke wort, wes darinne es, dat sal dy wol to weten werden, welt God, und ok Hoyman. God gheve dat sey myt leyve dar moyten komen, amen. Unde Fylyppus hebbe ick wedder to Frankenvorde sant umme to weten woyt umme dey 150 gulden sin efte men dey to Lubeke sal betalen ofte nicht. Darna dat eme weddervert, darna sal hey don. Hey sal derwert komen, herwedder darna, dat emen dat puntet und ick wyl, ofte God wyl, nu ut Andorper mart derwert kommen umme alle dynch wol uttorychten, welt God, wolde God gheven, dat dey laken dar quemen, so solden wy wol ghelt darvan maken van der ghenoden uns heren. Doy wol unde rame des besten in allen saken myt gaders Hoyman. Unde ick hebbe Hoyman mynen wyllen screven unde ok Tydeman Brekelvelden, dat hey ju des besten sal helppen ramen in allen saken. Dat deyt hey ok ghernne, dat weyt ick wol. Item so en weyt ick noch nicht, ofte myn broder to Lubeke wort es edder nicht. Ick salt in korte weten, welt God; anders so weit ick nu wat mer to scryven; mer var ewychliken wol in Gode unde make dy vrolich myt unsen vrenden. Ghescreven 2 weken vor pinxten 1419 in Brugghe.
: Briefwechsel Hildebrand Veckinchusen. Leipzig: S. Hirzel, 1921, Seite 46. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_233.jpg&oldid=- (Version vom 31.7.2018)
