Greteke wyf, so lat van dessen ghelde gheven tom ersten
| Gherwin Ummedenberch | 100 | marc. | Lub. |
| unde darnest so lat gheven Borchart van Hildensem | 100 | „ | „ |
| unde darnest lat gheven Arnt Salfyen ok | 100 | „ | „ |
| unde darnest so lat gheven Bertolt Herentreye ok | 100 | „ | „ |
| unde darnest so lat gheven Jacop Ghergouwen ok | 100 | „ | „ |
| unde darnest lat Hinrych opm Orde gheven | 50 | „ | „ |
| kondestu eme dar gheven 24 marc, so were hey betalt. |
Item kondestu dat want don vorkopen, so ghef dar Hinrych Wynneken unde Henrych Ryken ok wat gheldes.
Item her Albracht van der Brugghen gef ok wat.
Item so ghef her Albracht Erp ok wat.
Item so ghef Peter Hoyn unde Marcquart Holpen ok wat.
Item so sal hebben Johannes Everinchusen, dey to hus es myt her Bertolde Rolande, 35 marc Lub.
Item so wete, dat ick dy nu sende to Hamborch wort 3 terlinghe wandes an den cranmester, in den 2 terlingen sint 54 halve laken, dey men heyt Belardes, dey varve es aldus also 27 blauwe, 17 swarte, 6 gronne 4 rode, der laken sint 2 ton slachdoken, elk half stet 15 sl. gr. nyes gheldes, dat es elk half 5 marc 4 sl. Lub.
Item so es in den dorden terling 24 halve Bussche laken, also 15 swarte, der es 1 ton slachdoke 8 rode 1 blauwe, elk stet 18 sl. 6 d[WS 1]. dat es elk laken 6 marc Lub. 8 sl. Lub. erstes kopes. Desse laken unde dey andere lat vorkopen unde lat Hoyman ofte Fylyppus der laken wat voren to den Gryppeswolde int market, dar sey ummers vorkoft werden, dat wy dey lude moghen betalen.
Item so sende ick dy noch by dessem wande 1 bereven tunneken, dar es inne in er laden 2 gulden rynge myt 2 sofferen unde 2 huven unde 1 Arras unde 1 kerl unde ander prundelinghe, also du wol seyn solt, welt God. Item so wyl ick to Aken teyn in den namen Godes unde wyl sunder sument to Lubeke komen. Ick kondest nicht wol er reyden, darumme so rame des besten in allen saken unde segghe Herbort van Lynnen, dat hey dy ofte Hoyman helpe vorkopen dat want, op dat wy dey lude betalen moghen. Hiran leghet uns wol macht, darumme rame des besten.
Item es in den tunneken 1 gordel, dat doy Talleken opme Orde. Item so hevet my dey cranmester noch nicht mer dan 1 tunne sant van den 2 tunnen, dey ick eme to Hamborch brachte, dar hey my nicht wol med handelt hevet, hirmede kom ick wol mede to, dat kent God, dat es 1 quat tovorlat, dar ein man in vorsumet wert. Aldus so en weyt ick dy nu wat mer to scryven mer. Segghe Fylyppus, dat hey syk darto vorlate, dat ick ene meyne to senden to Frankenvorde in dey mysse, welt God. Segge Hoyman, dat sey dey laken vorkopen na mareganghe unde seyn an ein cleyne nicht, op dat wy ghelt moghen hebben. Doy wol, segghe unsen vrenden un den wy schuldych sin, dat ick kort dar wyl sin unde elken wol betalen, welt God. Hirmede so var
Anmerkungen (Wikisource)
- ↑ Korrigiert nach Berichtigungen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 238. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_238.jpg&oldid=- (Version vom 31.7.2018)
