|
Wilhelm Stieda (Hrsg.): Briefwechsel Hildebrand Veckinchusen |
|
|
222. Gerwin Marschede an Hildebrand Veckinchusen in Lübeck – 1419 Octbr. 11.
- Rev. St.-A. Orig. Pap. Adr.: Deme erbaren manne Hyldebrant Veckinchuesen to Luebeke littera detur. In dorso von der Hand des Empfängers: 1419 op sunte Katerynen[1] avent in Brugge untfanghen dessen breyf.
Vruentlike grote tovoren an mynen leven vruent. Hildebrant Veckinchuesen, weten sole gy, dat ik juewe breyve wol vornomen hebbe alzo umme de 450 mark, de ik hir betalen sal van juwer wegen. Ok so scryve gy my van 50 ℔ gr., de myn broder overkopen sal, dat sal tosamen maken an Prueschen gelde nicht vele myn den by den 900 marken unde alzo vele geldes en solen desse 5 terlinge nicht gelden. Unde ok so hebbe ik jue darop gesant, dat gi, ofte Got wel, untfangen hebben an wasse op 100 marc ofte ein cleine myn. Ik meynde gy solden dat gelt so drade nicht al overkoft hebben; dat was solde dar komen hebben ofte jo de breyve; ik dedet int beste, God geve dat et tom besten valle. Ik gaf de Bellerde daran dat par vor 13½ mark unde Lodewych Bueggendal unde ander borger koften se hir vor 13 mark dat par unde den andern terlink hebbe ik ok vorkoft vor 13½ mark 3 weken na sunte Mychgele[2] to betalen. Got geve, dat ik dan wol betalt werde, so mach ik vortan betalen. De Buesche unde Alstedesche stan noch al unvorkoft. Der Alstedesche is hir to male vele, se sint hir geven vor 16 mark dat par; van den kruempen unde schoren hebbe ik wat vorkoft by 6 stuecke, men ik en hebbe dar nein gelt vor. Ik meynde, ik solde gelt hebben hat, nue togen se to Breslouewe wart unde geven my nicht und vor Mertine[3] en komen se nicht wedder. Hirumme so syt hirop vordacht, leive Hildebrant, in der tyt unde schycket hir over noch by den 100 mark Pruesich, dat ik dat geld mede betale, ofte ik moet et overlaten gan, wante ik en hebbes nicht, dat ik jue mede mochte vorleggen, alzo ik wol er gedan hebbe unde noch aldues lange doen moste. Aldessen sommer wante war by de 2 laken, de gi my over 1 jare senten in mynes broders terlinge: 1 rot 1 bla unde 1 swart Lirsch laken quaem van Lubeke, desse 3 stuecke kofte my 1 man ave vor sunte Mychgele over 1 jar, wol 4 weken ofte by der mate vor Michgele, dar sach ik noch ni ₰ darvan, dat wet Got, doch ik hebbe jo dat gelt darvor utgeleget boven 50 mark, dat ik aldues lange untboren hebbe. Ik wolde, dat ik noch krygen konde op vastelavent. Leive Hildebrant, gi mogen lychte seggen ofte dencken, warumme dat ik juwe dink alzo vorborge, so helpe my Got, dat ik et umme juwen willen daen hebbe, op dat gy des to bet mede to gelde mochten komen. So leyt es et my, dat gy an juwen dinge tachter gan, des moge gi my wol gelovon. Item de geschoren laken wellen ser node van steden, wante er es hir vele unde se stan vele geldes, men kan nergen mede to gelde komen, ik hebbe hir ok noch ander geschoren, de hebben hir sedder sunte Johannes dage stan, ik kan er noch nicht myt like queit werden. Ik wel des besten gerne ramen, dat ik kan ofte Got will.
: Briefwechsel Hildebrand Veckinchusen. Leipzig: S. Hirzel, 1921, Seite 59. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_246.jpg&oldid=- (Version vom 31.7.2018)
