nicht wol woe hyr al dync utrychten unde ok to Lubeke unde al man wel nu van my betalt syn unde dey love es ute unde gy wolden ny gheloven, dat myn dync hard stont, ic vruochte dey warheyt sole er utkomen dan my gud sal syn. Got vorgevet al den, dey dar schult an hebben. Dat were nu beter, dat gy andern luden schuldych weren dan my, so mochte ic ju dey bet helppen. Item, Kornelys kan der pande hyr nicht vorkopen, unde ok ovele losen unde dey crallen wellen nicht met alle gelden, dar solde ic dat gelt van hebben unde aldus welt nergen wol. Got betert al umme, des behove ic wol unde wy al umme. Item, Tydeman Swartte es met kleyner ere van hyr unde he behavet syk wol to wachten; syne schuldemere hebben em naschycket unde wellen 500 gulden vorteren eder en in venknisse tobrengen, darumme warnet en also gy best kunnen. Aldus behovede wy al umme wol gud ghelucke. Item segget Eyngelbrecht, dat ic em noch nicht scryven kan op syn sake er desse mant eyn eynde hebbe. Grotet al vrunt. Ghescreven op unser leyven vrowen dach nativitatis anno 21 jar.
300. Tideman Brekelvelde an Hildebrand Veckinchusen. – 1421 Sept. 9.
- Rev. St.-A. Orig. Adr.: An Hildebrand Veckinchusen, war he is, littera detur.
Vruntlike grote tovorne screven. Wetet, Hildebrant, gude vrunt, dat ik juwe breveken, ghescreven 22 daghe in aughusto, wol vornomen hebbe, alse gy my scriven, dat ik ju screven hebbe, wo ik de helffte van der syden betalen wolde, de gy my allerlasten sanden, dat ik dat Sunnenschine scriven sole, dat he de helffte betale. Hirop so wetet, Hildebrant, dat ik Sunnenschine nu screven hebbe, dat he dar nicht van en betale wante wanner dat he en deels betalde, so moste he se al betalen. Hildebrant, gy hebben Dyrke Borghere de helffte overlaten vor de 20 ℔ grote, de he vor ju betalt hevet. Duchtet gy nu nutte sin, so wolde ik hir den luden, den gy hir schuldich sin, so vele gheldes tosegghen to ghevene alse de helffte van der syde tosecht. Wes juwe wille hir inne is dat scrivet my mit den ersten. Ik wolde, dat ik dar alret overlank op ghedacht hedde, doch, Hildebrant, van al der syden en is boven 5 ℔ nicht vorkofft. Duchte ju ok nutte, dat ik Margreten dat ghelt toseghede to ghevene, dat en wet ik nicht off dat nutte sy. Doch se moste umer ghelt hebben, sal se eten unde drinken. Ik en wet ju anders nicht to scrivene dan ik en denke nummende nein ghelt to ghevene van der syden, ik en hebbe juwen willen darvan, et en were dat et my mit rechte affghewunnen worde. Hirmede blivet ghesunt. Ghescreven 9 dathe in septembri anno 21.
Item, ik hebbe juwen brodere ok hirvan ghescreven.
Briefwechsel Hildebrand Veckinchusen, Seite 322. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_322.jpg&oldid=- (Version vom 31.7.2018)
