353. Tideman Brekelvelde (in Lübeck) an Hildebrand Veckinchusen. – 1423 Juni 18.
- Rev. St.-A. Orig. Adr.: An Hildebrand Veckinchusen littera detur. In dorso von der Hand des Empfängers: 23, 3 daghe in jullejus.
Vruntlike grote unde wes ik gudes vormach tovorne screven. Wetet, Hildebrant, gude vrunt, dat gy my vuste breve ghescreven hebben unde ik hebbe se vuste al wol vornomen. Wiste ik dar anders wat ton to donde. Gy screven my van Hinrik Brinkman, dat ik van eme nemen sole dat ghelt vor 2 ℔ grote. Hir hebbe ik ju vaken van ghescreven, dat ju Hinrik nicht gheven en wolde, wante he en hedde nicht 1 ₰ van des weghen, deme gy de 2 ℔ grote deden unde ok so en were he eme nicht schuldich. Hirumme so en ghisse ik ju hir nicht van to hebbene, wante deme gy dat ghelt ghedan hebben, de en is hir nicht, unde ok so en hevet he nicht.
Item, ik hebbe Herman Platenslegher vaken unde mannichwarve ghesecht, dat he ju rekenscop scriven solde van den vyghen unde ik sprak ene noch dallink unde he secht my wo he ju rekenscop ghescreven hebbe unde ok so hebbe he se Bokele ghedan unde de hebbe se vort Greteken ghedan unde, alse my dunket, so is men eme noch van den vighen schuldich 200 mark Lub. Darvan sal eme nu betalt werden op sunte Michel 45 mark, dat ander en kan he nicht seggen, off et wis off unwis sy unde he hevet Evert Molken ghegeven 100 mark Lub. unde nicht mer. Dat ik ene dar vele vorder ume spreken wolde, wat not is my des, sintemale dat des Evert Moelken nicht bespreken noch bearbeden en wel, deme dat ghelt tokomet.
Item Dyrk Gribe heve mit sinen schuldeners termin ghemaket in 10 jaren to betalene. Got gheve, dat he wol betale. Item, alse gy my ghescreven hebben van deme bisschoppe van Brandenborghe, dat he den breff hebben solde van unsem rade unde dat he de 600 ghulden utghegeven hedde des wetet, Hildebrant, dat unse rat den breff noch hevet, unde de 600 ghulden en sin noch nicht utghekomen. Den breff dede Ghebelinus unsen rade, unde ik vormode my, dat unse rat den breff nicht van sick en antwort, et en sy by unsen wetene Bertolt Herentey unde de mine. Mer vorwar, Hildebrant, ik wolde, dat gy juwe part van den 600 ghulden hedden, de mer dat men den breff overgheve.
Item so wetet, dat ik Evert Molken ghegeven hebbe 100 unde 16 mark unde 16½ ₰ und ik hebbe aver entfanghen by 9 mark, dat eme halff horet dan solde wy darto noch hebben an schult unde an doeken unde 3 haspe syden. Summa in al op dat wy al betalt werden unde syde unde doeke so vele ghelden alse ik Everde dat overgheven hebbe, summa is 200 mark min 3 mark. Mer, Hildebrant, et en wel nummermer al betalt werden, wante de ene sydenwerkesche is uns schuldich by 70 mark; dar en wert uns nummermer ₰ van.
Item, Margrete wonnet in der klokgheyterstrate unde juwe hus is toghesloten. Unde Margrete unde de kindere sin al ghesunt, Got de sy ghelovet. Ok so iz et, Got hebbe loff, mit Zyverde wat beter gheworden. Got geve, dat et gut mit eme under uns werde. Item, so ik vorneme, so meint Bokel
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 369. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_369.jpg&oldid=- (Version vom 31.7.2018)
