mochte einbreken an der summa hirboven screven. Aldus so stet dey sake tusschen Evert Moyelyke unsen swagher unde uns. God gheve, dat wy emen fol moten betalen, dat hey dan nicht drochte claghen mer. Ick hope hey hebbe noch nicht over uns claghet, al claghe wel dar solde neymant sin, dey emen wes geven solde. Wyl myn broder der 100 marc nicht utgheven, so mochte hey bet ghesweghen hebben, vante ick bat emen dar nu umme. Dyt late ick stan op sin gude recht byt God bettert.
Item soldet ummers also komen, dat wy des hus solden quyt gan vor 75 marc, her Hinrych Rappesulver unde darto dey rente, dey du noch schuldych byst, so wolde ick wol dat unse swagher Evert Moyelyk dat hus to sek nemme unde dey 2 panser, dey her Hinrych Rappesulver hevet unde darto dey pande, dey du vor dey rente stelt unde gheve dat ghelt ut, darvan also her Hinrych Rappesulver unde dey rente unde helde dat hus, unde pande konde wy dar wedder lossen wol unde gud. Konde wy nicht, dat dan Evert Moyelyk dat hus vorkoffte to unsen proffite unde behelde dat overghelt dan in mynrynghe van den brutschatte, dyt were better dan wy des hus quyt ghenghen half umme nicht, so mochtestu keghen sunte Mychelle darwedder infaren, so herde dey eghendom Evert Moyelyk to, so dreve dy dar neymant mer ut. Wolde God, dat ick dan utqueme, so mochte God gheven, dat wy dat so myt Evert also makeden, dat wy dat hus behelden. Hirop wes vorseyn myt unsen swagher Everde unde myt Brekelvelden unde myt mynem broder her Johan van Emmeren, hirinne so rame myt vrenden darinne dat allerbesten dat du kanst. Ick geve leyver vor dat hus des jars 35 marc Lub. unde ette 1 rychte to myn dan ick in enem kotten solde wonen umme 10 marc unde hedde 1 rychte to mer to etten. Unde ok queme ick dar, so solde ick dat hus wol binen enem jare offte dat hus dey eghendoem wol gheven umme 400 marc Lub. Darumme dencke hir harde wol op dat es van node, dat weyt neymant, wo dar ick dinch noch komen mochte. Ok so wonde ick ghernne by mynem swagher, wolde uns des God gunen, wolde dyt aldus komen to punten, so weret wol. Ick solde alto ghernne dat hus beholden, aldus so hebbe ick darop ghedach op desse tyt. Dus so duncket my dyt best sin. God geve dat et dyt dus komen mote, amen.
Item so hebbe ick dy nu sant 2 breyve in kort, den enen by Peter den loper, den anderen by Barrouwen, den loper. Dar rame des besten. Hirmede so var ewychlyken wol. Ghescreven op sunte Laurens avent 1423 myt der hast.
360. Reinhold Swarte in Köln an Hildebrand Veckinchusen in Brügge. – 1423 Aug. 23.
- Rev. St.-A. Orig. Adr.: An Hildebrand Vockinchusen to Brugge littera detur.
Vruntlike grote vorghescreven unde wes ich gudes vermach. Wetet, leyve om Hillebrand, dat wy al wol ghesund sin, God hebbe danck. Item
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 380. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_380.jpg&oldid=- (Version vom 31.7.2018)
