so hebbe ich juwe breve al wol vorstan unde my es ju unghemach leyt, dat God beteren mote unde zyn leyve moder unde dat ju neve Enghelbracht so vorsumed heved med dem rechte, dat was to male ufel vorsumed. Item wolde Johan Bokel noch hir komen, ich wolde jo med em spreken unde laten vorsoken of heren breve unde bede nycht helpen wolde, so wad ick hirin doen kan, dat wel ich alle weghe gernne doen unde hedde myn oem Syverd hir ghebleven, ich love wy heddend so ghearbeyded, ghy weren reyde ute, nu es dyt nycht ghescheen unde komed Bokel hir, ich wel dat beste darin doen, of God wel. Item so wad breve, dat ghy my hebben ghescreven, dey med an Bokel spreken, dey hebbe ick al to Lubeke ghesand in Bokel. Item dey copie van Jacob Schoteler, dey sende ick ju weder, vrunde zeghen, dat ju dey copie nycht vele scade en doed, wolde ju Jacob holden, dat hey ju gheloved heved, dat wer gud. Item so hebbe ich Bokel vele ghescreven ume ju cleder, my en komed ghen antworde. Item so zeghet men hir dat dey Romsche konychk zy ghereysed in Bemen unde anders en hor wy van em nycht sunderlix. Item leyve om, so wolde ich ju gerne altoes wad scryven, wyste ich wad dat ju to stade mochte komen. Anders nycht op dysse tyt dan ghebeidet to my. Unse her God mote ju bewarn. Ghescreven op sunte Bartholomeus avende anno 23 jar.
Item so en kan ich ju van Kornelis nycht ghescriven, wante hey en heved noch nycht to Venedyen ghewest. Hey es al by den marckgreven van Baden. Dey Venedyer hadden em eyn gud gheleyde gheven. Nu duncked my dat hey dar nycht eh wel. Hirume so en kan ich ju dar nycht van scryven unde issed zake, dat hey komed nu in dey mysse, so wel ick ju wol undersched darvan scryven.
361. Heinrich Hoep an Hildebrand Veckinchusen in Brügge. – 1423 Ende August.
- Rev. St.-A. Orig. Adr.: Hildebrant Vickinghusen up den steen. In dorso von der Hand des Empfängers: 1423 jar 18 daghe in september.
Hildebrant Vickinghusen, leve vruent, wetet dat gy hirin vinden de kenne wat elkerlik utghelecht heft unde wedder untfangen, dar moghe gy na reken, wat juw darvan tokumpt, dat sal me teken up juwen breff.
Int erst Evert van Meghen, Hildebrand Zuderman hebben utghelecht 413 ℔ 17 sl. 8 ₰, noch 18 ℔ 16 sl. Summa 432 ℔ 13 sl. 8 ₰. Hirup untfanghen 211 ℔ 17 sl. 8 ₰.
Hildebrant Vickinchusen heft utghelecht 170 ℔. Hirup untfanghen 50 ℔.
Johannes Covelt heft utghelecht 70 ℔ 13 sl. 2 ₰. Hirup untfanghen 30 ℔.
Her Godevard Foysaen heft utghelecht 60 ℔. De heft nyt untfangen.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 381. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_381.jpg&oldid=- (Version vom 31.7.2018)
