Seite:Briefwechsel Hildebrand Veckinchusen 394.jpg

Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

	Wilhelm Stieda (Hrsg.): Briefwechsel Hildebrand Veckinchusen

ju noch, myne macht van gelde es cleyne unde myn lyf es nicht stark, mochte ic vele mede wynnen, ic kunde to Brugge nicht komen unde wan ic 3 dage stark sy, so moet ic 8 dage inne sytten, unde ic vru^echte, dat welle nicht lange met my waren, darumme wyste ic gerne juwe gantze ansprake unde schelynge, kan ic ju dan met vruntscap nicht vornogen, so moten uns vrunde eder recht scheden, ic wolde ju eder eymanden noch unredelycheyt doen dat tegen myner seylen salycheyt wesen solde.

Item ic hebbe met vrunden sproken unde wellen her Jorden bydden ju to helppen to den besten, dat hey mach met hulppe der andern sendeboden, dey met em darkomen. Ic hebbe met her Hynric Rapsylver sproken unde ghebeden van ju^ewer wegen, dat hey met dem rade spreke unde her Jorden ju^ewe sake uterlyken bevelen unde vordegedyngen laten lyk eren borgeren, dyt heft my her Hynric togheseget, dat dyt wol scheyn sole unde dyt welle wy wol bestellen also wy uterlykest unde best kunnen, men dat wy her Jorden solen vele inscryft geven eder al breyve dey gy uns ghescreven hebben, dat en vinden nicht gud syn. Her Hynric seget her Jorden sole ju rechtes helppen na al synen besten vormogen al ander dync wert em dar wol bet to weten dan men em hyr seggen eder scryven kan. Unde vrunden duncket gud, dat gy ju dync op kort setten also dat ju dat recht nicht lenger vortogert werde. Wan Got uthulppen heft op vrye sekerstede, hebbe gy dan met eymande icht to doene, dat nemet dan vort an. Ic wel ju by her Jorden vrunden gut duncken scryven, men wy weten noch nicht, woe kort dat sey darwart wellen. Ic kan ju op desse tyt nicht mer scryven; ic sy nicht stark. Got betert al umme. Ghescreven 16 dage vor pynxsten anno 24.

Zyvert Veckynchusen, Lubeke.

378. Tideman Brekelvelde (in Lübeck) an Hildebrand Veckinchusen in Brügge. – 1424 Juli 13.

Rev. St.-A. Orig. Adr.: An Hildebrand Veckinchusen to Brugge littera detur. In dorso von der Hand des Empfängers: 1424, 2 daghe in den oust; dyt es dey rekenschap van den 2200 Rynschen gulden 291½ ℔ grote so sey tachter by 8 sl. Lubesch.

Vruntlike grote unde wes ik gudes vormach. Wetet, Hildebrant, gude vrunt, dat ik juwen breff, ghescreven 15 daghe in junio unde ok andere breve vuste al wol vornomen hebbe unde en nemet des in nein arch, dat ik ju op al breve nein antworde ghescreven en hebbe, wante vorwar, ik en wet nicht, wat ik ju op som punte scriven sal. Doch alse gy my nu ghescreven hebben, dat ik wol do dorch Got unde ere unde recht unde scriven ju, was ju noch van der Venedyeschen selscop noch boren mach, unde dat ik wol do unde late dat juwen wive werden unde weret, dat se my wes schuldich were, dat ik dat darvan nemen solde; hirop, Hildebrant, so wetet, dat gy to der selscop noch schuldich sin 4½ mark Lub., de gy mer entfanghen hebben, dan ju boren mach alzet noch gherekent is.

Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 394. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_394.jpg&oldid=- (Version vom 31.7.2018)