Item, Dyrk Grybe, de hevet sin termin mit sinen schuldeners ghemaket in 10 jaren to betalene. Darvan hevet he Margreten wol so vele gheven off mer, alse er van deme ersten termine boret, wol de helffte mer.
Item, alse gy ghescreven hebben van deme quartir Ampsterdampsche laken, dat ju Herman op me Orde gheven hadde in sinen testemente, des wetet, dat Willem Rycherdes unde ik dar ok noch nicht van entfanghen en hebben. Wy en kunnen dat noch to neinen ende brenghen.
Item, alse gy scriven van Rychert van der Linden, des so wetet, dat he lenck dan ½ jar dot ghewest hevet. Got hebbe de seyle.
Item, so sende ik ju de rekenscop hirinne van den 2200 Rinsche ghulden, de Bertolt Herentey unde ik van Ghobelinus des kopmans klerke entfenghen.
Item; so en wete wy anders nicht unse raed en hebbe den breff noch alse van deme Romeschen koning unde gy scriven, dat gy gherne weten wolden, off de bisschop van Brandeborch hersande 600 Rinsche ghulden offte unse heren dan den breff ok leveren solden. Hildebrant, ik vormode my, dat unse rad den breff nicht van sick en antworen, et en sy mit Bertoldes unde mit minen willlen, mer ik vruchte, dat de ghulden lancksem utkomen solen.
Item, Hildebrant, so hebbe ik Evert Molken in al von juwer weghen gheven 100 unde 46 mark 5 sl. 5½ ₰.
Item, so is uns noch schuldich Wobbeke Pasinars 69 mark 7 sl. 6 ₰. Hirvan so en wel uns nicht werden. Item Ludeke Lutterke 2 sl. 9 ₰. Item Taleke Swerins 15 mark min 2 ₰. Item Gheseke van Minden 7 mark 14 sl. 4 ₰. Item Gheseke Tymmermans 28 mark 2 sl. 10 ₰. Item Telseke Sweins 3 mark min 6 ₰. Item Dyrk Grybe 5 mark. Item so hebbe wy noch to deme Sunde 9 stelken doeke, de stan 5 mark 10 sl. Summa hirvan in all van schult unde doeke 100 unde 43 mark 5 sl. 11 ₰. Ik wolde, dat wy vor desse schult unde doeke hedden 60 mark.
Hildebrant, vrunt, ik en wet ju anders nicht to scrivene, mer weret Godes wille, so wolde ik dat my dus dane scrivent nein noet en were, op dat gy sulven al dinge dor driven mochten. Des mote ju Got ghunnen, alse ik dat gherne seghe. Item so en kan ik noch nicht weten off de stede darwardes werden theine off nicht. Mer hir en maket neine wat van. Hirmede blivet ghesunt. Ghescreven op sunte Margreten dach anno 24.
Item, alse my Dyrk Gribe noch dallink ghesecht hevet, alse ik dessen breff ghescreven hadde, so hevet he Margreten ghegeven van der 7 Arnamsche ghulden[1].
- ↑ Der Vertrag des insolventen D. Grybe mit seinen Gläubigern 1423 März 7 im Urkundenbuch der Stadt Lübeck Bd. 6 N. 498.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 395. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_395.jpg&oldid=- (Version vom 31.7.2018)
