428. Aufzeichnung eines Ungenannten über kaufmännische Schulden.
- Rev. St.-A.
Item Ludeke Swarte so wetet, dat dit de schult is, de men schuldig is in de selschap.
To den ersten Lasse Oelenessone van Nykopinge 9 ferd.
Item Hinric Hinrikessone von Abo 11 ferd.
Item Hartwich Horn to Kosseline 13 mark myn 1 schot.
Item her Iuryan Fedeler to Plotzkou 12 mark unde 1 ferd.
Item Jesse Peterssene van Schevingen (!) 7 mark.
Item noch is schuldich schipper Clauwes Schroder unde Herman Pantsermaker von Nikopinge 20 mark van wyne.
Item Lawrens Speit van Abo 4 mark myn 1 ferd.
Item Hannes von Enten 4½ mark to der Ryge vor 1 wit Mestensch laken.
Item Niclauwes Westgote unde Arnolder, beide van Linckopinge 3 mark.
Item Otte Burmester van Schivelbene 27 ferd vor 3 Konditsche.
Item Hinric Holste 2 mark to dem Holme.
Item Henneke Oulnessone van Abo 5 mark.
Item noch Otte Burmester 80 mark vor Tornddessche laken.
Item so hort desse schulde Hildebrande half tou, dey hir vorscreven stet.
Item Herman Rincjuck van rosynen 6 mark 1 frd.
Item dey Willessche 25 scot.
429. Hans Byleveld in Köln an Hildebrand Veckinchusen in Brügge.
- Rev. St.-A. Orig. Pap. Adr.: An den erberen man Hillebrant Weckynchusen to Brugge schal desse bref.
Minen denst tovoren an mynen junchern Hillebrant Veckynchusen. Weten sole gy, dat my dat let is, dat gy juwes geldes so lange gebeydet hebben, went et also ik van ju gescheydet was, dat ik solde ywen syden hebben to Hamborch vorkoft, wente gy seden my, ik solde allike wol des besten ramen, dat hebbe ik gedan und ik nam se mede van Hamborch to Lubeke. Do ik in dat Venkenbrok quam, do wart ik gevangen und de syde wart my genomen und se wart my wedder up ein 5[1] punt, na dat war my verworpen in den broke. De kanfas, de war my genomen und ik mostet mit ue (!) in den broke sytten ein dach und den ok to Gerensloet tollen 2 nobelen und koept dat gelt over, dat sole gy wynden to Hamborch, also gy my gesacht hadden, dat ik et dar laten solde, konde ik et ju sulven nicht bryngen. Nu sole gy et wynden to Hamborch, wente ik haddet ju lange sulven gebracht und et heft my eventureken gegan. Darmede vaart wol to Gode. Geschreven to Colne in sunt Symonys dach avende.
- ↑ Die Zahlen sind in einem solchen Zwischenräume voneinander geschrieben, daß ich vorziehe: „up ein 5 punt“ zu lesen, statt 15 punt.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 434. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_434.jpg&oldid=- (Version vom 31.7.2018)
