Brugge wart wel, off to Collen wart. Seker, Hildebrant, wiste ik eme dat beste to radene, dat wolde ik gerne don, mer hir sin vrunde, de meinen, dat he sick also wol to Luneborge gheneren solde alse to Collen unde dar is nu en gut hus to Luneborge, dat to siner behoff stet. Wiste ik eme dat beste to radene, dat wolde ik gerne don.
Item, Hildebrant, ik wel des besten by der zyden ramen to vorkopene, rahmet gy ok des besten dar by der witter syden, alse ik ju screven hebbe. Item ik hope, dat gy dat scharlaken wol entfangen hebben. Item ik en vorneme noch nicht, off uns Evert van Borstal wat ghesant hebbe, off nicht Ik hebbet eme ghenoch ghescreven, dat he ju vortsenden solde, wes he van unser wegene hedde.
432. Tideman Brekelvelde in Lübeck an Hildebrand Veckinchusen in Brügge.
- Rev. St.-A. Orig. Adr.: An Hildebrant Veckinchusen to Brugge littera detur.
Vruntlike grote tovorne screven. Wetet, Hildebrant, dat ik unse 4 Ypersche laken vorkofft hebbe Willem Schonewede, dat laken vor 37 mark min 4 sl., to betalende op sunte Jacobs dach unvortoghert. Item, Hildebrant, so sin juwe Tomasche laken tome Sunde noch unvorkofft unde se en wellen dar nicht 27½ mark Sundesch ghelden unde dar en is nein rede ghelt to bekomene ume laken. Hirume, Hildebrant, iz et sake, dat my nein ghelt in 3 off in 4 daghen van deme Sunde en komet van juwen laken, so mot ik de 30 ℔ grote weder overkopen. Ik hadde enen breff vanme Sunde, de was ghescreven op sunte Marcus avent; do en weren se noch nicht vorkofft. Hildebrant, ik mochte se hir geven hebben to 14 mark rede ghelt, besunder dat hemelbla unde satgrone, des en wolden se nicht hebben unde ok wolde ik node wesen de solken guden kop laken geven wolde ume der lude sprekent willen. Darume sante ik se to deme Sunde, alse ik ju ok wol er ghescreven hebbe. Hirume, Hildebrant, so wesset hirop vor sein, wante also helpe my Got, dat ik es nicht en hebbe to vorleggene. Item, Hildebrant, ik hebbe in juwen breve wol vornomen, wo dat werk vorkofft is en deels ume 12 ℔ unde en deels 12 ℔ 4 sl. grote. Unde alse gy scriven, dat gy vorkofft hebben, so en breke dar 1 bote ane, et sal wesen 4500 unde 3 bote. Dar denket op. Item ik hebbe wol vornomen, dat dat was ghegeven is ume 49 mark.
Item, Hildebrant, my en is noch nicht vele gheldes gheworden van syde. Ok so en hebbe ik sint neine vorkofft, mer ik meine, dat ik drade ghelt hebben sole unde ok syden to vorkopene. Gheve Got sine gnade, dat hir was unde werk queme, so wolde ik et maken, wo ik mochte, dat ik uns wat koffte op som ghelt, dat men uns schuldich is. Hildebrant, ik hebbe so vele to donde mit mime heren van Darbte, dat ik ju nicht mer scriven en kan. He ridet dallink to schippe unde ik denke mit eme to ridene to Travemunde. Screven mit hast 2 daghe in maiio.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 437. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_437.jpg&oldid=- (Version vom 31.7.2018)
