Item, Hildebrant, so en vorneme ik noch nicht off uns Evert van Borstal icht ghesant hebbe, dar ik eme dallink hardde breve ume screven hebbe. Ik bidde ju, dat gy eme dar ok van screven unde weset mede quat op my, dat ik et an eme sant hebbe.
433. Tideman Brekelvelde in Lüneburg an Hildebrand Veckinchusen in Brügge.
- Rev. St.-A. Orig. Adr.: An Hildebrant Veckinchusen to Brugg littera detur.
Vruntlike grote tovorne. Wetet, Hildebrant, dat ik juwen breff, ghescreven op ten eiirsten dach van der vasten, hebbe ik wol vornomen, alse gy screven wo van der syde dar ghekomen sy 12 ℔ unde ok so sy dar wol 22 ballen ander syde unde de worde in 3 daghen al vorkofft. Hildebrant, ik hebbe hir by 4 wecken ghewest unde, Gode erbarmet, ik en hebe hir nicht vele bedreven, wante my dunket, dat wy unses gudes jamerliken quiit werden altomale in gudeme loven. Hildebrant, juwe broder Syvert de wel ok noch in twen daghen van hir riden unde ik denke ok in desser wecken to Lubeke wart. Got geve mit leve unde wy wellen Peter noch dallink inden thorn bringgen unde laten ene sitten to der tiit, off he sick icht bet bedenken wele, wante dat gut dar boven dunket my, dat uns noch nicht volghen en kan. Item, Hildebrant, wy solen hir ok kranke rekenscop hebben van Hanse van Minden. Got de betert. Ik en kan my nicht vornemen, dat wy acht hebben solen. Got de betert. Item, Hildebrant, alse gy screven, dat ik mit den vrowen spreken sole, off se ok an de witten syde so dur wellen, Hildebrant, alse ik dar kome, so wel ik darume spreken. Doch myn gutdunkent is, dat gy er umer wat kopen unde umer mit den eiirsten. Item so sende ik ju dat scharlaken in ener tunnen an Tideman Borstal. Vorliket ju mit deme manne, wante dat laken en is neine ghadingge int lant, alse gy wol sein. Hirmede blivet ghesunt. Ghescreven des dinschedaghes na Oculi.
Item, Hildebrant, ik hebbe de 20 ℔ grote betalt unde Sander Hop hefft by minen besten 60 mark entfangghen. Hildebrant, were ik to Lubeke west, ik hedde dat ghelt alrede al betalt al wo ik eme dan hedde.
434. Tideman Brekelvelde in Lübeck an Hildebrand Veckinchusen in Brügge.
- Rev. St.-A. Orig. Adr.: An Hildebrant Veckinchusen to Brugge littera detur.
Vruntlike grote tovorne screven. Hildebrant ju gheleve to wetene, dat ik ju nu sunderige nicht en wet to scriven dan my quam rechtevort van Zyverde enen breff van Luneborg, dar hevet he my de deghedingge inne ghescreven, alse de op dat nyet vorramet hebben mit Peter unde de wel
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 438. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_438.jpg&oldid=- (Version vom 31.7.2018)
