440. Gottschalk Lintschede und Hans Radelwisch in Reval an Hildebrand Veckinchusen und Heinrich von Staden in Brügge.
- Rev. St.-A. Orig. Adr.: An Hildebrant Voccinchuzen unde Hinrike van Staden to Brugge sall desse breff.
Vruntlike grote tovorn wat wy gudes vormogen. Wetet guden vrunde, dat wy ju senden ersten by schipper Tideman vanme Loe 5 stro wasses, dar is innen 6 boddeme, de wegen hir myt dem stroe, als men se in de schepe plecht to wegene, 4 schippunt myn 3 lispunt; in dem selven schepe 1 tunne myt schevensen, dar is inne 15 000, weget 29 lispunt; de halve vracht is betalt. De vracht is 10 mark van der last werkes in beiden schepen allens.
Item in Pilgerim van den Wigere 1 tunne, dar is inne ersten vor dem boddeme, dar steit 1000, (unde) 5 timmer marten, darnest 1500 popelen, darnegest 1000 schevensen, darnegest 2000 myn 1 bote troinissen. Desse have is alzo alse se van den Russen entfangen is vor vigen, et quam des enen dages van Nouwerden; des andern dages trede wy et in de tunne; vort vor dem rechten boddemme is 4000 schevenissen, dyt sende wy ju nu in dessen twen schepen, Got geve beholdene reise unde de hilligen dre koninge. De ander tunne, de wecht 24 lispunt; halve vracht unde halff winnegelt betalt. Dyt gut 
is aldus gemerket, kunen wy ju wes mer senden vor dem herveste, des enwete wy noch nicht, wy hopen ju mer to sendene; dat solt, dat licht hir noch wol halff. Dat solt en wil nement hebben. Der vigen hebbe wy noch by 40 lesten, der qwadesten sin wy mest qwit alzo se my scriven van Nouwerden. Wy hebben siden stukke; wy hebben siren boch vor de getredene vigen, wille gy malk hebben en siden stukke to enen kerle, dat moge gy uns scriven offt wat tafften to wamboisen, mer hir to Revele enkonde wy mit den Russen nicht gedaen, se hadden so wol eren kore over somer van dem gude, dat se dar nicht an enwolden unde al de schivmans unde de bosmans, de hadden wat, de deden uns groten schaden mede, de geven guden kopp. Hir weren tovele lude, de se hadden, se hebben somige tendelink gegeven vor 1 stukke an qwader butinge. Anders nicht uppe desse tit. Moget wol in Gode. Gescreven des negesten dages na unser vruwen dage der ersten to Revele.
441. Gottschalk Lintschede und Hans Radelwisch in Reval an Hildebrand Veckinchusen und Heinrich von Staden in Brügge.
- Rev. St.-A. Orig. Adr.: An Hildebrant Voccinkhuzen unde an Hinrik van Staden to Brugge come desse breff.
Vruntlike grote tovoren unde wat wy gudes vormogen. Wetet, guden vrunde, dat wy hadden gesant der vigen to Nouwerden tusschen den 60 off 70 lesten myt dem schepe, dat gy derwert gewunnen hadden tor Nuwert, de sin vorkofft opp ver off viff leste na, dar hebbe wy vore allerhande
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 443. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_443.jpg&oldid=- (Version vom 31.7.2018)
