schaden kan bekomen to doen van en 10 ofte 12 m., den wel ik angan umme dat dyt gelt nicht wedder overkome, men der 30 ℔ en hebbe ic nicht geseget to geven, dar rychtet ju op, wo gi konen, ik kan nicht bet. Got sy myt jue. Gescreven op nyjars dach. Got unse leve Here vorlene uns allen ein salych nyjar.
451. Gerwin Marschede an Hildebrand Vechinchusen in Brügge.
- Rev. St.-A. Orig. Pap. Adr.: An den erbaren man Hyldebrand Veckinchuesen to Bruegge littera detur. Darunter von H. V. Hand: Item heft Marschede Fylypus to Danseke to hope sunder koft – 36 marc 18 sl. myn 1 scot sunder koft to Danseke.
Vruntlike grote tovoren an mynen leven vruent Hildebrant Veckinchuese. In juewen breyve hebbe ik wol vorstan, dat gi my by Korde senden 1 mueczen unde 1 par hosen, de wel ik gerne in vruentschop untfangen unde dregen umme juewen willen. Got danke jue darvor, men ik kan my juewes gudes nicht underwynden, myn dink es alzo gelegen, alzo ik jue er gescreven hebbe, dat ik es nicht doen kan. Unde gi sint an my nicht vorwart myt juewen dinge, wan ik to hues bin, so wel ik boven gerne des besten helpen raden, dat ik kan. Men sendet hir eymandes de et jue vorware. Gy scryven my, dat ik de vygen jo vorkopen sole, sal ik se vorkopen unde geven se vor 2 marc, war es dat guet to, my wundert sere, dat gi hir alzo dane guet jegen en somer senden, wan gy es nicht vormogen lyggen to laten dey lude de de vygen unde rosinen nue kopen solen, de wellen er vele beteren kop hebben, den mer ut Vlanderen halen ofte tuegen mach. Hirumme so moet ik ein keller darto meyden unde laten se stan myt to der tyt, dat si jo vorkoft moten sin, so sint de dan noch tyt genouech gueden kop to geven, men doch kan er wat vorkopen ofte altomale, dar wel ik to helpen dat beste ik kan. Vortmer so wetet, leve Hildebrant, dat dat gelt hir van dage to dage leyver wert, dar en houede gi jue nicht vor unde ik hebbet ok mynen broder vaken gescreven unde he en lovet my ok nicht, dat uns to groten schaden komet.
Vortmer so en hevet my Clawarte de 20 ℔ nicht betalt, he seget alle dage he wellet my schicken, men ik en hebbe noch nicht 1 ₰. Vortmer alzo gi my scryven van dem solte, dat ik es nicht vorkopen sal, de tyt es nue umme kommen op 14 dage na, so moet ik dat solt betalen, men dar en hebbe ik nein gelt do, anders wolde ik et gerne lygen laten.
Vortmer so wetet, dat my Fylyppus kostede uttoreyden to Ryge wart 26 marc 5 sl., des heft he noch underwege genomen 9 ferd. myn 1 scot; des hebbe ik eme nue wedder gedaen to tergelde to Flanderen wart 8 marc 18 sl.; noch sal ic koste vor en betalen. Got sy myt jue. Gescreven des mytweken vor Palmen.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 451. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_451.jpg&oldid=- (Version vom 31.7.2018)
