dat es my leyf, men wes ic der selscap schuldych sy, dat korttet nicht af, er dat al vast rekent sy und dat gelt overkoft sy, so moge wy dan al dync to eynem gantsen eynde afkortten und scryven. Gy hebben my vele screven und ic ju vele weder screven; ic hope ummer gy solen nu alles dynges wol vroet syn, gy wolden gernen dey 122 cronen in dey ander rekenscap brengen und ic wel dey an der rekenscap beholden op dat dey rekenscap vast blyve, dey ic ju vorscreven hebbe.
Item wetet leyve broder, dat my nu desse knecht van Lubeke und umme desser tydynge wyllen sende wy ene ju vord und gy mogen in den Lubeschen breyven und ok in Sryppers breyven wol vernemen, dat et en al to unwyllen es, dat gy en also cleyne scryven und der selscap dync nicht also hartlyken und wol vorstaen, also des wol noet were und uns allen wol nutte were; darumme leyve broder an desser selscap wel uns dyen und vorderf lyggen, darumme nemet dey to hertten. Slyper sande ju nu eynen boden und scref ju umme alle tydynge und gy scryven eme also kord und pluemp weder, dat hey tomale tornych is, al scryvet hey ju dat nicht, doch dyt latet ju nicht synnen, dat ic ju dyt screven hebbe und grotet alle vrunt. Ic scryve ju mannych dync int beste umme des wyllen, dat ic dat gernen gud sege, dat nemet int beste, desser selscap dync wel mer arbeyt und vord jaget (!) wesen dan ander kopenscap.
Item na deme dat gy Slyper screven hebben 100 punt syden to kopen in dey selscap, dat doet und latet dat na also ic ju screve van Hans van Mynden und sendet der selscap 150 punt syden ofte darby und scryvet my al tydynge weder by den loper, den ju Slyper sendet und ramet des besten al umme. Hans van Mynden und Hans van der Brueggen hebben my screven, dat gy dat gelt vrylyken op sey overkopen met den eyrsten, dat gy wellen. Item gy scryven my nicht of ju wat komen sy in Arnd van Hassele von unsem gude. Got gevet ic wolde, dat wy unse gud ut Lyflande hedden und unse gud an eynem jar nummer in Lyfflande queme. Groet alle vrunt; Got voget al umme to den besten to ewycheyt.
480. Sivert Veckinchusen aus Köln an Hildebrand Veckinchusen in Brügge.
- Rev. St.-A. Orig. Adr.: An Hyldebrand Veckynchusen to Brugge littera detur.
Das Blatt hat zur Niederschrift des Namens nicht mehr ausgereicht; so steht dieser auf der Rückseite: Zyverd Veckynchusen Kolne.
Broderlyke leyve vorscreven wetet dat ic ju sende in schepper Doenewolt 15 stuecke wasses aldus 
, dey hebbe ic und Arnd koft op dey vastmyssen to betalen; noch 3 stuecke wasses aldus 
; noch 3 stro wasses cleyne bodeme, in eynem stro 12 stucke, in eynem 10 stucke, in eynem 5 stucke und es nicht merket. Van elk bode van 19 sole gy geven wand to Bruegge 2 gulden myn 1 ord, van den
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 470. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_470.jpg&oldid=- (Version vom 31.7.2018)
