wo gy et met uns holden wyllen. Hyrmede levet wol unde grotet myne suster sere ende alle vrunt. Ghescreven des myddewekens na sunte Johannes daghe.
495. Engelbrecht Wytte in Riga an Hildebrand Veckinchusen in Brügge.
- Rev. St.-A. Orig. Pap. Adr.: An Hyllebrant Veckinchusen tho Brugge sal dese brief detur.
In dem zusammengelegten Briefe zwei weitere Zettel von derselben Hand, die dien Brief schrieb.
Vruntlike grote thovoren ghescreven und wes ich ghuedes vormacht an mynen leven swagher Hyllebrant Veckinchusen. Wetet, dat my Sivert jue broder ghescreven hevet, dat he myn was to Hoemborcht wart ghesant hevet, God gheve, dat et jue myt leve tor hant kome; doet wol und doet dat beste darby als ghy altyt gherne doen. Vortmer so wetet leve swagher, also van den gueede, dat ic in Bonit hadde und in Bouetin hadde of dar ich af werden wolde. Item so hadde ic in Reimer Bouetin[1] 8 stucke wasses und in Enghelbret Bonit 9 stucke was. Dit was weghet tohope 12½ schippunt und nocht in Bouetin en tuenne werkes, dar was inne int irste en dusent troenissen, de were ghebuenden by 10 und by 15 und nocht 8 timmer troenissen, de weren beter dan de ander und nocht in dersulven tuenne 3 dusent und 23 timmer und en tendelinc Smoelensch werkes und noch 12 timmer rodes werkes und nocht 4 timmer pakkynge myn en tendelinc und nocht in derselven tunne 4 dusent schevenisse myn en quartyer schevenissen. Und Kort Vorsel en tuenne werkes, de ginc my half an als Tydeken Roede wol wet, ho et darumme is. Doet wol und helpet hir des besten in raden. Kan uns it weder werden, des moge wy wachtende wesen und ok so hadde Bernt, des God sin sele hev, und Evert, myn neve, dar in tween kysten up 60 nobelen und was wleisch und vele gueedes wissches und medes daryn ghehat, soldet hebben hed et jue toeghekomen dat hedde ic gherne ghesien, nu en isset lider nicht gheschien. Darmede wart wol und blivet ghesunt to langer tyt in Gode und gebiet over uns to allen tyden und gruetet uns Gryett unse dochter sere und al vrunde. Ghescreven des irsten sunnedages na twelften.
1. Doet wol, leve swagher, Reymer Boytin, des God sin siele, de blef my schuldich 5ten halven fer[dinge]. Wer et, dat van schepe icht weder worde und spreket Ludeken Stenhorst, of he dar icht beholden hedde, dat he et angeve. Und ic hev ok en sestienden deel an den holk.
2. Vortmer so sint dat twe stucke was, de weren tohope bereven und sint gemerket mit dessen merke 
, de horen Evert Znoeyen tho, de verkopet en und holdet dat ghelt dar, wente he wyl, of God wyl, myt den irst darwesen.
- ↑ H. R. I, 5 N. 44256: Boytyn.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 481. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_481.jpg&oldid=- (Version vom 31.7.2018)
