1275. Coswig. Bischof Heinrich I von Brandenburg überträgt die früher dem Collegiatstifte zu Coswig zugewiesene Pfarrei daselbst dem dortigen Frauenkloster bei der Kirche des h. Nicolaus, trifft verschiedene hierauf bezügliche Bestimmungen und erwähnt, dass Graf Siegfrid I von Anhalt das genannte Collegiatstift mit dem Patronatsrechte über die Kirche zu Gnetsch entschädigt habe.
Heinricus miseratione divina Brandenburgensis ecclesie episcopus universis Christi fidelibus presentem litteram inspecturis salutem in Domino sempiternam. Quia diversitatem corporum diversitas sequitur animorum, ideo secundum mutationes animorum negociorum mutationes aliquociens supsequuntur. Sane propter devotionem illustris principis comitis Siffridi de Anehalt et honorabilis domine Sophie sororis eius de consensu decani et capituli Cozwicensis parrochiam eiusdem oppidi cum omnibus suis proventibus de ecclesia sancti Nicolay ad ecclesiam virginis gloriose nos meminimus transtulisse1. Verum quia ex hoc inter ipsos canonicos et plebem parrochie discordie fuit exorta materia, nunc saniori ducti consilio de consensu canonicorum eorundem et ob2 preces dictam parrochiam ad sorores ordinis beati Augustini residentes apud ecclesiam beati Nicolay reducimus, ut ipse sorores eam habeant et possideant de cetero in quiete. Excipimus autem decimas ipsius parrochie et annonam, que schepelkorn dicitur, et denarios censuales cum curiis3 dominorum liberis et aliis, in quibus Otto miles dictus de Pouch, Arnoldus de Brothe, Johannes de Margrevendorph et soror Ermengardis habitant, et partem strate terrarum intra menia civitatis, que descendit ab ecclesia beate virginis usque ad rivum, qui ipsam stratam dividit per transversum. Quas curias sive domos cum omni familia, hospitibus sive alumpnis earum cum predictis decimis ad ecclesiam beate virginis volumus pertinere ita, ut ipsi sepulturam habeant ibidem et alia recipiant sacramenta, etiam si canonicos in aliis curiis vel domibus contigerit commorari. Scole eciam clericorum non alibi quam apud ecclesiam beate virginis perpetuo habeantur. Volumus insuper, ut in quatuor festivitatibus virginis gloriose et in festo dedicacionis ecclesie eius per totum diem ad sanctum Nicolaum nulla predicatio habeatur. In quatuor eciam dictis festivitatibus et dedicatione non petatur in ecclesia vel cimiterio sive stationibus canonicorum cum tabula sororum, sed in sua ecclesia possunt petere, mensam cum reliquiis exponere et indulgencias, si quas habent, sine sollempnitate poterunt intimare. Modis eciam omnibus caveatur, ne sepe dicte sorores beatam virginem eligant in patronam vel ecclesiam seu altare faciant dedicari sive aliam sollempnitatem indicant, sed in sua ecclesia petant, reliquias exponant ac sine sollempnitate suas indicant indulgentias, sicut placet. Ut autem prefata ecclesia beate virginis ex ista translatione reddatur indempnis, prefatus comes ius patronatus ecclesie in Gnez, Magdeburgensis diocesis, eidem ecclesie cum omnibus proventibus suis contulit in restaurum, cuius rei gratia canonici decimam quinque mansorum ad hospitale pertinentium, quas actenus possederunt, dictis sororibus relaxarunt. Et ut predicta omnia perpetuo maneant inconvulsa, sigilli nostri appensione litteram presentem duximus roborandam.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 336. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_336.jpg&oldid=- (Version vom 31.7.2018)
