1276. Juni 18. Erzbischof Konrad II von Magdeburg nimmt unter Erwähnung der Ueberweisung einer Reihe von Pfarreien, darunter auch der beiden zu Freckleben, an das dortige Capitel seitens seines Vorgängers Ruprecht die Pfarre zu Burg von dieser Schenkung aus und entschädigt das Domcapitel durch drei andere Pfarreien.
In nomine sancte et individue trinitatis amen. Conradus Dei gratia sancte Magdeburgensis ecclesie archiepiscopus universis presentibus et futuris imperpetuum. Qui super gregem dominicum pastor constituitur, sedulo debet revolvere ante oculos mentis sue, ut gregi sibi credito non solum spiritualiter provideat, verum etiam temporaliter, unde vivat, recolens eius quod dicitur: Temporalia spiritualibus suffragantur. Ad instar huius et hac consideratione ductus, venerabilis in Christo pater ac dominus pie recordationis Ropertus archiepiscopus, respiciens ad sanctum Magdeburgensem capitulum in proventibus annuis tenue satis et indigum, ut fratres eiusdem capituli, plerique ab alto sanguine procreati, pro conditionum suarum decentia non sufficiant ad hospitalitatis gratiam personis honorabilibus celebriter exhibendam nec ad elemosinam Christi pauperibus salubriter erogandam, in supplementum defectus huiusmodi dictum ditavit et dotavit capitulum de duodecim ecclesiis parrochialibus infra scriptis: de Conre et Alsleve, de Glynde et Důmensleve, de duabus parrochiis in Vrekeleve, item de Bydericz, Scartowe ac Burch, de Tuchim, Resegane similiter et de Loůborch, quas annexit et alligavit suo capitulo, ut archiepiscopus, qui pro tempore fuerit, canonicis intra suam ecclesiam illas porrigere debet, dum vacarint. Sane ex quo ad variationem temporum aliquotiens humanorum sequitur variatio statutorum, cupimus ad singulorum et omnium notitiam pervenire, quod viso lapsu, declinatione ac desolatione civitatis nostre Borch, licet plura ad statum eiusdem et consolationem concepimus remedia loco et tempore concedente Domino adhibenda, decrevimus tamen eidem succurrere in presenti remedio, quo possimus, saniori: sexta feria ante natale beati Johannis baptiste in nostro capitulo generali parrochiam in Borch alligatam nostro et annexam capitulo absolvimus ab eodem tam ad ampliationem divini cultus procurandam in Borch quam ad emendationem civitatis sepius repetite, statuentes et ordinantes de plenaria voluntate nostri capituli et de consensu eius unanimi, quod, quam primum vacaverit hec parrochia, et in futurum debeat porrigi plebano personalem ibi residentiam facienti. In restaurum autem tres parrochias, Ottersleve, Borne et Byere, restituimus, tradimus et alligamus nostro capitulo cum matura provisione vice parrochialis ecclesie Borch exempte. Sic etenim rebus extrinsecus ditioni nostre suppositis damus operam, ut non negligamus sanctam Magdeburgensem ecclesiam matrem nostram. In huius exemptionis facte ac annexionis evidens testimonium presentem litteram conscribi fecimus tam sigillo nostro quam nostri capituli communitam. Datum anno Domini mo.cco.lxxvj, xiiijo Kalendas Julii, pontificatus nostri anno xo.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 346. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_346.jpg&oldid=- (Version vom 31.7.2018)
