|
Diverse: Codex diplomaticus Anhaltinus/Band 3 |
|
|
Ok scole scade sin sein tu Lutteken Wederstede, to Hedersleve und deme proveste darsilves. — Dar antwerde we greve Bern alsus to: Disse hove, disse dorp, dit gut hören to usen dingstulen, to useme vanlene, dar we weteleken mede belent sin, des we ychteghe heren hebben und güden weren. Dar ne hebbe we dem byscope van Halberstat nicht umme to antwerde und willen darumme dün, dat recht is, wat de spreken et cetera. — Dar spreke we here Ot und her Herman dat vor en recht: Use here greve Bern scal sine dingstule, sine vanien, sine dorp, de darto hören, behalden mit sins ens hant uppen hilligen, ene rechten were tughen silve sevede, so is dat gut to rechte sin. Dat spreke we et cetera. .
Ok scal scade sin sein deme proveste to Adesleve, to Dizstorp, to Daldorp. — Dar antwerde we greve Bern alsus to: Is dar scade sein, de is sein in eneme openen werren und sint mit deme silven güde weteleken belent und willen darumme don, wat recht si, wat de spreken, to den we unse ding laten hebben. — Dar spreke we her Ot und her Herman dat vor en recht: Is on scade sein an eneme openen werren, dat man darumme nicht antwerden darf; is on scade sein buten deme werren, wen se dar- umme sculdegen, den scal unse here greve Bern to rechte setten, den he vormach. Dat spreke we her Ot und her Herman, dat dat recht is et cetera.
Ok scal scade sin sein her Tupeken, Bern van Dytvorde, Tylen Scütten. — Dar antwerde we greve Bern alsus to: Se waren unse vyende und scochten uns. Des be- stridde we se und vinghen se. Des sint se van us komen mit ener rechten sone und mit ener rechten orvede, und willen darumme don, wat recht si, wat de spreken et cetera. Umme Eylwardestorp deme wille we antwerden, also we to rechte scolen, dat uns datsilve weder sei. — Dar spreke we her Ot und her Herman dat vor en recht: Hed use here greve Bern ene rechte sone, ene rechte orvede van her Tupeken undvan, des he volkomen mach, also recht, dar ne hed unse here greve Bern deme byscope nicht umme to antwerde. Dat spreke we et cetera. Umme Eylkestorp dar spreke we her Ot und her Herman dat vor en recht et cetera.
Ok scal scade sin sein her Johanse van Crendorp uppe elven marc. — Dar antwerde we greve Bern alsus to: Her Johans van Crendorp und ander use man hadden ghe- loved en innilegher der ebdescinne van Quedelingborch. Do de tyt quam, do ne moch- ten se nicht inneliggen vor ores lives not. Des bode we uns dicke to rechte der eb- desscinne. Hed her Johans van Crendorp darenboven yeneghe penninghe utgheven vor uns, dar wille we umme don, wat recht si, wad de spreken, to den we unse ding laten hebben. — Dar spreke we her Ot und her Herman dat vor en recht: Hed her Johans van Crendorp yeneghe penninghe utgegeven vor unsen heren greven Bern, dat he ome wetelek maken mach, dat he se ome billiken wederghif. Dar spreke we, dat dat recht is et cetera.
Ok scal scade sin sein her Johanse van Crendorp van her Quartire, van Hobusche, van her Bern van Nyenburg, van Koneman deme iünghen und van deme Koke. — Dar antwerde we greve Bern alsus to: Unse man, de uns benomed sin, de wille we to rechte setten, de we vormoghen, also de spreken, to den we unse ding laten hebben. — Dar spreke we her Ot und her Herman dat vor en recht: Use her greve Bern scal sine man to rechte setten, de he vormach, de ome benomed sin, unde sine vesten scal he unsculdegen oder en sin man, de uppe deme hus beseten is. Dat spreke we, dat dat recht is et cetera.
Diverse: Codex diplomaticus Anhaltinus/Band 3. Dessau: Emil Barth, 1877, Seite 337. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_3_337.jpg&oldid=- (Version vom 31.7.2018)
