DIe Astronomi vnd erfarnen des gestirns / haben den tag zwyfaltig getheylt / als in naturalem / das ist / in natürlichen tag / vnd Artificialem / das ist / in wercklichen tag.
Der natürlich tag helt in sich / bede tag vnd nacht / vnd ist 24 stund lang.
Solcher natürlicher tag würt viererley weiß angefangen / Zuom ersten fahen an solchen natürlichen tag die Greci / Babilonij / Assirij / Caldei / Persier / etc. Von erstlichen auff steigen der sonnen / Zuom andern die Walhen / Athenienser / Juden / Egypter / von dem vndergang der sonnen / Zuom dritten die Theologi / Geystlichen vnd Roemer von mitter nacht / Zuom vierden die Astrologi vnd Aabes zuo mittemtag.
Der wercklich tag hat sein anfang von erstlichen auff steigen der sonnen / werend biß zuo nidergang der selbigen / des gleichen die wercklich nacht / hat jren anfang von nidergang der sonnen / werend biß zuo vffgang der selbigen.
Dise bederley tag / haben die elteren getheylt in zweyerley stund / als gleich vnd vngleiche stund.
Die gleichen stund / beschliessen den natürlichen tag wie der angefangen würt in 24 stunden.
Aber die vngleichen stund des wercklichen tags / haben jren anfang von vffgang der sonnen biß zuo nidergang / vnd solcher tag würt geteylt in 12 gleiche theyl / er sey wie lang oder wie kurtz er woelle / des gleichen die wercklich
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 9. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_09.jpg&oldid=- (Version vom 31.7.2018)
