vnd mit dem andern tritt inn das l oder n mit solcher weitin mach einen gantzen circkel auß dem puncten o / den selben circkel theyl in 12 gleich theyl / anzuofahen bey dem l oder n / vnd die zwen nechsten puncten vor vnd nach dem l oder n zeüch mit einer geraden lini zuosammen / das es sey ein paralel lini gegen der linien a k / das thuo von allen puncten zuo puncten / im circkel getheylt / vnd wo die selbigen lini das stuck des circkels l k n abschneiden / die selbigen puncten merck. Auß den selbigen puncten reiß gerad linien in den puncten. A / so hastu den anfang der 12 zeychen / vnd sollen dann die zeychen darein geschriben werden / in massen wie in nachfolgenden figuren anzeygt würt.
DIß lini der 12 zeychen soltu lang hinauß ziehen nach dem dann die not sein würt / vnd die groesse des horologiums erheyscht / Darnach reissz ein gerad creütz lini über die lini a k / mitten durch den puncten a / Vnd so du wilt machen die zwoolff zeychen in das horologion horizontale / so geh in den quadranten / vnd nym auß dem driangel die weiten des halben diameters des horizontalis a e / vnd trag sy in den puncten a der 12 zeychen lini / durch das a gezogen / auff welche seitten du wilt. Oder mach das horologion verticale mit den 12 zeychen / so nym auß dem driangel die weitin des halben diameters des verticals d e / vnd trag sye in den puncten a / wie vorgesagt ist / vnd mit dem andern fuoß mach ein puncten auff die zwerch lini auff die andern seiten / die zeychne mit d / darnach nym für dich auff ein ort / besundern die stund lini / des horizontals / vnd nym aber auß dem driangel die weitin a d / vnd trag sye auß dem puncten a horizontalis vff die mittag lini / vnnd zeychne des einen fuoß puncten mit f / Durch den selben puncten f reissz ein gerad creütz lini / über die gemelt mittag lini / vnd durch alle stund lini hinauß
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 29. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_29.jpg&oldid=- (Version vom 31.7.2018)
