DArnach nym die weitin von der mittag lini biß an die regel der abscheyd / vnd trags auff stuck des circkels trumms / vom f hinauff / vnd mach ein puncten mit g / das ist auff dem punct. b c / verzeychnet auß dem punct. g / zeüch ein gerad lini duch den puncten d / so hast du die schreg am hauß / Darnach nym die weitin vom horizontal / oder das kürtzer theyl am driangel / welchs man auff den plano oder ebne braucht / vnd setz den ein fuß inn den puncten d / vnnd mit dem andern mach ein puncten vff der mittag lini. Auß dem selben puncten zeüch linien gegen dem puncten die auff der zwerch lini seind / da die 12. stund anstossen auff der lini d f / vnd darnach mach ein gerecht creütz lini / über die schreg lini / durch den puncten d / vnd merck wo die Schreg lini von dem Horizontali oder von den selbigen lini beruert würt / oder werden kan / die zeüch hinzuo / biß sye die schreg linien berueren. Wann nun solliches gemacht ist / so nym das vertical / oder das man an die Mauren braucht / vnd setz die selbig weitin mit dem einen fuß des circkels in den puncten d / vnd mit dem andern mach ein puncten auff die creütz lini / Auß dem selbigen puncten zeüch ein lini über die schreg lini / wo sye die lini beruert haben / die auß dem horizontali gegen den zwoelff stund linien gezogen seind / vnnd als vil die schreg lini ergreifft / als vil werden stunden am hauß gemacht / Dise stunden oder linien trag darnach ab mit einem circkel durch ein halben circkel bogen auff ein ander papyr / Darauff reissz gleich des halben circkel bogens groesse / durch den du jhn abtregst / so hast du das horologion gerecht.
HAb fleissz mit dem abtragen / dann diß alles ist dir nur zuom muster vnd vorbild fürgestelt / du würst inn eygner erfarung baß bericht werden / so du das vorgebildt recht verstehst. Nun merck wann du das horologion machen wilt / so merck wo der compaß oder die lini am richtscheit / oder regel auff dem brettlin hinauff geht / do muoß auch der stefft hingericht werden / nach dem der compaß hin steht / vnd die meysten vhren hin fallen / darnach wissz dich zuo richten.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 52. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_52.jpg&oldid=- (Version vom 31.7.2018)
