SO du nun die schrege eines yeden hauß erfunden hast / wie hye anzeygt ist / so lerne auch die 12. zeychen in ein yede schrege eyn zuo schreiben / nym auß dem driangel die weitin a d / wie zuouor auch gelernt ist / so ein vhr vffrecht steht im verticali / solch weitin a d / setz in den puncten a / des horologions mit eim fuß / mit dem andern mach ein puncten f / verzeychnet wie zeuor. Den driangel oder die weitin a d trag in den vorgesetzten kegel / mit den zwoelff zeychen wie vor / so du solchs gethon hast / so setze den circkel in den puncten f / des horologions / vnd mit dem andern mach ein halben circkel / durch den puncten a / biß auff die lini ♈ vnd ♎ / die durch den puncten f geht / vnd nachmals geh mit solcher weitin auff das brettlin / darauff die schrege abgemessen hast / vnd setze den circkel inn den puncten a / vnnd mit dem andern fuß mach auch ein halben circkel / vnnd zeüch dann auß dem puncten a ein gerade lini durch das pünctlein das du gemacht hast / an der lini oder regel / welches die schrege am hauß ist mit e verzeychnet / vnd wann du nun solches gethon hast / so setz den circkel mit eim fuß in den puncten b / mit dem andern inn den puncten e / des yetz gemachten circkels auff dem brettlin / vnd solche weitin b e trag inn den puncten. Im horologion do der vorgemacht halb circkel die lini ♈ vnnd ♎ / antrifft / den verzeychen mit g / am andern ort mit h / in die 2. puncten g h magst du setzen den circkel / in welchen du wilt / alleyn das die lini die durch gezogen würt / auff wertz oder übersich gehet / da die stunden am meysten zuosamen fallen / vnd da sye am meysten ligen bey einander.
So nun der circkel inn dem puncten g oder h steht / so mach einen puncten über sich / in halbem circkel / den verzeychne mit i / das dann die recht lini ♈ vnd ♎ / in seiner schreg ist / so du dann in die weitin f a / wie vor gelert ist / getragen hast inn die zwoelff zeychen lini / vnd hast gerad durch den puncten f d / ein lini gezogen / so hast du alle puncten der 12. zeychen / auff der selben lini. Nachmals nym auß dem horologion die weitin von a / biß an die lini ♈ vnd ♎ / wo ein yede stund lini sye durch schneidt / dise weitin trag dann in den puncten d / inn der ober creütz lini der 11.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 53. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_53.jpg&oldid=- (Version vom 31.7.2018)
