die radij lenger vnd kürtzer / die felder darzwischen weiter vnd enger machen / wie du das hye nach vffgerissen sychst.
Item so du ein vertical machest / so soltu mercken wo das knoepfflin stehn soll / nym den driangel / vnd setze die spitz a d / in den vorgemachten puncten / dardurch die lini d e ♈ vnd ♎ geht / auch a d / auß dem driangel / darnach du dann das horologion gemacht hast / also / das das d auß dem driangel werd gesetzt in den puncten a / des horologion / vnd die spitz oder puncten a des driangels / inn den puncten f / des horologions der lini ♈ vnd ♎ / vnd wenn du das also hast / so syhe wo die spitz e des driangels den stefft anruert oder endet / da soll das knoepfflein angemacht sein / das zeygt dir dann die zwoelff zeychen vnnd die tag lenge / vnd ander stunden.
DEr Quadrant haltet ein viertheyl eins circkels / darzuo etlich linien / durch welche wir moegen wissen die grad der sonnen / vnd jr auff vnd absteigen / auch die hoehe der sternen vnd aller hoehe vnnd tyeffe / auch aller weitin vnd lenge / als der stett / laender / vnd brunnen / etc. den mach also.
MAch ein Quadranten / wie du zuouor gelernt bist / vß getheylt in 90 grad / vnd zuo beyden seiten mit seinen spacien vnd den puncten mit a verzeychnet / vnd an beyden seiten / zuor rechten mit c / zuor lincken mit b / an der andern seiten a c / setz zwey binlein mit kleynen loechlen / wie die figur anzeygt. Nun setze den circkel in den puncten a / den andern fuoß streck auß ein kleyns über das halb gegen dem b / vnd zeüch ein bogen biß an die lini c / der erst punct heyßt f / der ander g / vnd theyl denn f vnd g in 5. gleich theyl / vnd die puncten verzeychne mit h i k
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 57. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_57.jpg&oldid=- (Version vom 31.7.2018)
