in 30. teyl oder grad / vnden vnd oben wie dir zuouor angezeygt ist in der figur. Nun bleiben noch 6. ander spacien / darein man die monet schreibt / wie nach volgt / darzuo ein taefelein ist / darumb such in welchem grad d e ♑ der Jenner anfahet / darauff leg die regel im leüffer vnd auff den puncten a / vnd zeüch ein lini durch drey spacia vnden / darnach luog in welchem grad ♒ der Hornung anfahet / da hin setz die regel / vnd auff den puncten a / vnd zeüch ein ander lini / vnd begreiff die 3. spacia / vnd zwischen die vor gemacht lini vnd die yetz gemacht / schreib den Jenner vnd also far fürt mit allen 12. Moneten / such eins yeden anfang in seinem zeychen / die zal suoch dann in den vorgeschribnen zeychen / wie du yetz gethon hast / vnden setz die tag / vnd oben die zal / darnach die nammen der Monat / wie du sichst in der fügung / vnd wann der Monat hat 30. tag / so theyl jn in 5. zuo 6. malen / so aber der Monat hat 31. so laß on geuerd eins tags spacien / das ander theyl in 6. gleich theyl da eins 5. bedeüt / der Hornung hat 28. tag / darumb theyl jn in 4. gleich theyl / eins für 7. merck der Christmonat / vnd Junius die an die oerter des leüffers kommen / da werden eins yeden tag halb hinauff in die obern spacien gesetzt / vnd halb in die vndern / wie du sichst / dann die Sonn oder die zeit / theylt sich in jren tagen vnd kert wider. Darnach schreib die zal der tag / so ist der leüffer gemacht.
DIe Leyter zuo machen wie du sichst in der figur / theyl die mittel lini zwischen dem a vnd p ober dem leüffer in zwey gleich theyl / vnd in die mitt diser lini setz den circkel mit eim fuß / vnd mit dem andern mach auff den beyden seiten des quadranten puncten / da sye der circkel anruert / da würstu ein gerecht viereck außziehen in den puncten 9. der mittel lini / darnach zeüch 2. ander lini den graden vnd der zal wie volgt / ein yede seiten geteylt in 12. gleich theyl / vnd in den puncten ein faden / daran ein berlein / so ists gerecht.
Anmerkungen (Wikisource)
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 59. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_59.jpg&oldid=- (Version vom 31.7.2018)
