unbekannt: Datt högeste unde öldeste water recht | |
|
punde dar na dat ein jewelck dar inne heff in medebeteringe des schaden / Vnd de schipper schal van sinem schepe vnd gude / fracht geuen gelick so de kopman deyt van synem gude / Ein yeweleck schipman schal ein vath frey hebben / vnde hebben se meer gudes / so möten se ock mede tho legghen yn der beteringe des schaden / dar na dat ein yeweck inne hefft / vnd is yd sake dat se malckander nicht wol en helpen (alse guden gesellen tho behört) wen men in sodanen nöden is / so schölen se ock nicht freyes hebben / vnde dyt schal dem Schippern by synem ede belöuet werden.
Item yd begyfft sick dat ein Schipper syne mast houwet in groten nöden / alse wen yd störmet vnd grot vnwedder is / he is schüldich tho ropen syne Koplüde vnd wysen en de nodt / vnd seggen dat ydt sy geschen vmme tho beholden schip / lyff vnde gudt / Vnderwylen kumpt ydt wol dat he syne Kabelen houwet / vnd moth Anker vnd Touwe varen laten vmme tho beholden schip / lyff vnde gudt / he is alle beyde mast vnd ancker schüldich
unbekannt:Datt högeste unde öldeste water recht. Lübeck: Jurgen Richloff, 1537, Seite 13. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Datt_h%C3%B6geste_unde_%C3%B6ldeste_water_recht_13.jpg&oldid=- (Version vom 18.8.2016)