Hattenhausen / Hildewartshausen / vnnd Creutzburg / LandGraff Ludwigen verkaufft hat. 39. Ruggerus II. Von ihm sind erbawet die zwey Frawen Hospital / eine im Stifft / die ander in der Loher Gassen. 40. Conradus II. 41. Henricus III. vnder welchem im Jahr 1199. oder 1200. zu Fulda bey Nachts ein Fewer entstanden / vnd grossen Schaden an Menschen / vnd Gütern gethan hat; so auch hernach A. 1225. geschehen ist. 42. Hartmannus I. 43. Cuno. 44. Conradus III. von Malkes / welcher mit Bischoff Hermann zu Würtzburg / wegen der Statt Hamelburg / vnnd eines stattlichen Feldes / so fast bey die zehen tausend Schritt von Fulda gelegen / gute Wäyde / vnd ein herrlichen Graßboden hat / vnnd Thamersfeld genannt wird / Krieg geführt hat Er hat sich hernach deß Regiments abgethan / vnnd hat Ertzbischoff Sigfried zu Mäyntz / mit Willen deß Papsts / die Kirch Fulda verwaltet / vnnd ein gülden Creutz / mit köstlichen Edelsteinen machen lassen / so 180 Marck lötigs Goldes gewogen hat / wie dessen gedencken Müntzer d. pag. vnnd Brouver pag. 306. Dieser Apt Cunrad verkauffte An. 1233. etliche Höfe vnd Güter / zu Roßdorff vnnd Mardorff gelegen / dem Spital S. Francisci zu Marpurg / welcher von der Gräffin Elisabeth erbawet ist / vmb anderthalb hundert Marck wichtigs Silbers. A. 1237. haben die Juden bey Fulda / in der Christ-Nacht / in der Zygelmühl 5. Knäblein vmbgebracht / deßwegen von den Burgern auch viel Juden zu Fulda seyn getödtet / vnd viel in die Gefängnuß geschleppet worden. Deßgleichen Juden-Schlacht ist geschehen Anno 1349. vnder dem Abbt Henrico von Hohenburg; davon besiehe Müntzer in der Fuldischen Chronic pag. 151. a. Anno 1238. seyn die Franciscaner Münch gen Fulda kommen. 45. Henricus IV. Von diesem Abbt sind Newhofen / vnd Stoßberg / mit Mawren / Wällen / vnd Gräben vmbgeben. Wie auch das Schloß Herbrachthausen erbawet worden. 46. Berthous II. von Leipoltz / welcher im Jahr 1271. in seinem Oratorio, von seinen Lehenleuthen / nemlich von Steinawe / von Schenckenwald / von Brantowe / vnd von Eberßberg / vmbgebracht worden; welche alle auff vnderschiedliche Weise eines bösen Todtes gestorben / vnd ihre Schlösser zerstöhret worden seyn / wie in der getruckten Histori von den Landgraffen in Thüringen stehet. Item beym Becherer in der Thüring. Chr. p. 291. 292. Müntzer f. 145. erzelet noch mehr der Mordthäter Namen; die Schlösser / NidernSchleitz / Franckenstein / Wartenburg / Schwartzenfelß / Bockerßburg / setzt er / seyen bey dieses Abbts Leben verstöret. 47. Berthous III. 48. Berthous IV. 49. Marquardus II. welcher An. 1288. durch Zauberey vnnd geärtzte Handschuch / so ihme ein Weibs-Person geben / vmbkommen ist. Wie bey Brouvero p. 316. zu sehen. Etliche sagen / es seye durch ein köstliches Kleynoth geschehen; davon besiehe Müntzer fol. 148. Rein. Renecc. Tom. 1. Hist. Iul. p. 30. 50. Henricus V. von Wylnau: Vnder diesem Abbt ist Franckenstein / vnnd Wyldeck / mit seiner Zugehör / Saltzungen / Waldenburg / zum Stifft bracht. 51. Eberhardus von Rotenstein. 52. Henricus VI. von Hohenberg; vnder welchem sich vmbs Jahr 1330. die Auffruhr der Bürger zu Fulda erhebt / vnd seyn sie Anno 31. darauff gar in die alte Statt / oder Abbtey / gefallen / deß Abbts Schloß / sampt dem sehr festen Thurn / zu Boden geworffen; vnd den Porthoff angezündet / vnd sonsten da vbel gehauset. Seyn auch die Berg-Clöster S. Petri / vnd vnser Frawen / daselbst / von Raub / vnd Brand / nicht vnverschonet blieben. Ist aber eine schwere Straff darauff erfolgt / dann der Abbt etlichen die Kopff lassen abschlagen / vnnd an der enthäupten Häuser steinern Köpff lassen machen / welche noch A. 1548. zu sehen gewesen / wie Valent. Müntzer / so in solchem Jahr sein Chronic endet / f. 50. a. bezeugen thut. Vnd hat gemelter Abbt hernach die newe Burg / Item das Kauffhauß erbawet. Ist gestorben An. 1353. 53. Henricus VII. A. 1364. seyn allein in der Statt Fulda mehr / als 3000. Menschen an der Pest gestorben. 54. Conradus ein Graff von Hanaw / der Ann. 1382. zu Spangenberg in Hessen vmbgebracht worden. 55. Friderich Romrod. 56 Johann von Merlaw / welcher Anno 1440. gestorben / vnd ein gar grosse Glocken in den Thumb / Nahmens Osanna / hat machen lassen. 57 Hermann von Buchenaw. 58. Reinhardus von Wilnaw / vnder dem A. 1466. der Pfarrkirchen Baw / nach obgedachtem empfangenen Schaden zu Fulda angefangen worden ist.
Matthäus Merian: Topographia Hassiae. Frankfurt am Mayn: Matthäus Merians Erben, 1655, Seite 67. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Hassiae_096.jpg&oldid=- (Version vom 15.2.2018)
