die Augspurgische Confession fortgepflantzet worden / biß daß bey Landgraf Moritzens Regierung / im Jahr 1605. die Religions-Enderung sich erhoben / vnnd seynd die der vngeänderten Augspurgischen Confession zugethane Herrn Professores folgends gen Giessen gezogen. Als aber Anno 1623. den 1. Aprilis nach achtzehen Järiger litis pendentz der Außspruch vnd die Endvrtheil wegen der Marpurgischen Succession zu Regenspurg erfolgt / vnnd An. 24. zur Execution gelangt: So ist darauff im Jahr 1625. den 3.Junij / die Hohe Schul allhie / von Herrn Landgraf Ludwigen dem jüngern zu Hessen / Darmstattischer Lini / regierendem Lands-Fürsten / bestelt / vnd seyn die Herrn Professores von Giessen wider hieher gebracht / vnd D. Balthasar Mentzerus zum Rectore Magnifico, vnd wegen dessen Leibs Vnpäßlichkeit D. Helfricus Ulricus Hunnius zum Pro-Rectore angeordnet worden / vnnd die Vniversität wider in Auffnehmen kommen / vnd haben folgends An. 1627. die zween regierende Fürsten / in dem Fürstlichen Sampthauß Hessen / benantlich Herr L. Wilhelm zu Cassel / vnd Herr L. Georg zu Hessen Darmstatt / sich gäntzlich vnd allerdings verglichen / vnnd zwar auff Käyserliche Confirmation, welche hernach mit Rath vnnd assens deß Churfürstlichen Collegij / auch aller deß heiligen Reichs Creyß Außschreibender / so dann die Würde Reichs deputierter Stände habender Fürsten / sonderlich auch der Erbverbrüderten vnd Erbvereinigten Chur- vnd Fürstlichen Häusser / Sachsen vnnd Brandenburg / vnd anderer mehr Fürsten / in vim sanctionis pragmaticae erfolgt. Welcher gestalt aber solcher Vertrag hernacher im Jahr 1628. den 27. Martij / in dem güldenen Schloß Saal zu Cassel / von beyden Fürstlichen Theilen / bethewert vnd beschworen worden / darüber hat ein Notarius zu Cassel / Namens Daniel Avemann / ein offenes Instrument auffgerichtet / welches zu Marpurg durch den Truck publiciret worden: Krafft welchen Vergleichs die Fürstliche Hessen-Darmstattische Lini / vnder anderm die Statt Marpurg / Item die Vniversität / deren Jura, Privilegia, Auffsicht / Verwaltung / Vniversitäts Gebäw / etc. vnd zwar Erblich bekommen / darneben sich verbunden / bey Ihrer Käyserl. May. entweder newe Privilegia zu einer Vniversität / oder Hohen-Schul / im Nider-Fürstenthumb Hessen / oder die Translation der Giessischen / für die Casselische Lini / ohne derselben Vnkosten / zu wegen zubringen / oder / wo es nicht zu erhalten / darfür zehen tausend fl. zu bezahlen. Was aber die Vniversitäts Güter / vnnd Gefälle / so in 2. gleiche Theil zu theilen: Item die Bestellung deß Hoffgerichts allhie zu Marpurg / vnd anders mehr / beyde Linien Casselisch- vnd Darmstattische anbetreffend / belangen thäte / so seynd davon absonderliche Puncten auffgesetzet worden; wie hievon / vnd was sich ferners darauff begeben / in dem tom. 1. Theatri Europaei Meriani fol. 1135. et seqq. von andern hieobstehenden Sachen aber als die Beschreibung deß Flusses Löhn / oder Lani, in den Institut. Orator. D. Conradi Dieterici pag. 61. die Epitaphia zu Marpurg in den delicijs Itinerum Nathanis Chytraei p. 830. et seqq. vnd die Beschreibung der Statt selbsten / ausser den bevor angezogenen Authorn / beym C. Ens in delic. apodem. pag. 205. P. Bertio lib. 3. Commentat. Rerum Germ. vnd insonderheit beym R. Lorichio Hadamario, in schol. ad progymnas. Aphthonij, p. 131. b. seqq. ed. Lugdun. welcher gestalt aber / die von Giessen hieher transferirte Vniversität / vom Herrn Landgraf Georgen / An. 1650 wider nacher Giessen versetzt worden / oben bey Giessen; zu lesen.
Anno 1640. haben sich die Frantzosen / vnd von Hertzog Bernharden zu Sachsen also genannte Weymarischen Kriegsvölcker allhie: Item im Hüttenberg / vnd der Orten anfangs gar feindselig / hernach aber etwas gelinder erzeiget. In der Franckfurtischen Herbst-Relation deß 1644. Jahrs / stehet zu ende / oder am 96. Blat / daß Herr Landgraf Georg Anordnung gethan / daß die Adeliche Exercitia, als in Mathesi, frembden Spraachen / Reiten / Fechten / Tantzen / vnnd dergleichen / vmb gar leydenliche honoraria, zu Marpurg angerichtet worden / vnd im Schwang gehen. Da auch benebenst etlichen jungen Fürstlichen Personen sich neun Grafen befunden.
Im Jahr 1646. hat Herrn Landgraff
Matthäus Merian: Topographia Hassiae. Frankfurt am Mayn: Matthäus Merians Erben, 1655, Seite 106. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Hassiae_155.jpg&oldid=- (Version vom 31.7.2018)
