zu. Sonsten werden die Malefitz-Personen erstlich zu Klingenaw examinirt / vnnd wann die That erwiesen / dieselbe so dann dem gedachten Vogt zu Baden vberantwortet.
Zwischen Zurzach / vnd Coblentz / (daselbst die Aar / oder Arola in den Rhein fällt) ist der mitler Lauffen / oder Wasserbruch im Rhein / von den Scribenten sonsten Catarrhact / oder Fall deß Rheins genannt / allda ein gantzer Grad durch den Rhein gehet / so in der mitten ein Lücken hat / dardurch zween Weydling neben einander fahren können / wardurch (wann der Rhein klein ist) der gantze Fluß scheust / vnd da man Bretter vber dieselbige auff beyde Felsen leget / man trocknes Fusses von der Germanier / auff die Helvetier Seiten gehen kan: Im Sommer aber / wann der Rhein groß ist / so schwelt er sich / vnnd ergiest sich alsdann vber den gantzen Felsen herunder / also / daß niemand hindurch schiffen kan / vnnd werden alle Wahren oberhalb desselben außgeladen / sonderlich alles Saltz / so in das Bernisch Gebiet geführet wird / so sonsten / wann der Rhein klein ist / mit Weydlingen durch die Lücken geführet werden. Welches so viel vns wissend / bey keinem Authore also zu finden / vnd dahero Herrn Johann Zieglern / Handelsmann zu Zürich / der solchen Lauffen selbsten allda abgezeichnet / vnnd An. 1641. günstig communicirt hat / billig zu dancken ist.
Das ander Stättlein / nemblich obangedeutes Keyserstuel / ligt vnter dem Einfluß der Glat am Rhein / auff Helvetier Erdreich / vber der Brücken aber / auff Teutschem Boden / das Schloß. Dieses Stättlein gehört sonsten dem Herrn Bischoff zu Costantz. Weilen es aber mit der hohen Obrigkeit vnter die Schweitzerische Landvogtey Baden gerechnet wird / so hat es auch daher allhie / vnter den Schweitzerischen Orten / seine Stell. Besihe von diesem allem / was von Baden / vnnd anderm gesagt worden / insonderheit Stumpfij Schweitzer Chronic / der letzten edition in Anno 1606: Item Munsteri Cosmographi, auch am letzten in Anno 1628. gedruckt / vnd Josiam Simlerum de Republ. Helvetiorum: der Bericht aber von den bey Wettingen gefundenen Pfenningen / ist vns schrifftlich in gunsten communicirt worden.
In Italia: welche Statt vnd herumb ligendes Ländlein / den 3. Orten Vry / Schweitz / vnnd Vnderwalden / gehörig / wie hievon oben in der General Beschreibung der Eydgnoßschaft gemeldet worden ist. Liget am Ende deß Gebürgs / vber dem langen See / so man Lago Maggiore nennet / am Fluß Ticino, oder Tesino, vnd ist vest. Es haben gemelte Orth / solches Bellizona, oder Bilitonum, von den Herren von Monfax erkaufft.
Ligt auff 2. guter Meyl von Zug / gegen Mitternacht / bey zwo kleiner Meylwegs von Zürich / gegen Nidergang / vnd 2. starcke Meyl vnder Lucern / an der Rüß / vff der Seiten deß Zürichgäws. Wird getheilet in die Ober vnd Nidere Statt. Die Obere vnd lustigere / ligt auff einem Bühel / die Nieder vnten gegen der Rüß. Hat ein schöne Brücken vber das Wasser / auch ein liebliche Aw / vnd Platz im Wasser. Ist vorhin ein Reichs-Statt / hernach Oesterreichisch gewesen / ehe sie an die Eydgenossen kommen / mit deren Regierung es eine Gelegenheit / wie oben mit Baden hat: gehöret denen acht alten Haupt Orten in der Schwytz. Sie behält noch ihr alte Römische Caeremonien / vnnd hat etwas Landtschafft / Leuth vnd Gericht / das Keller-Ampt genannt. Stumpf. in Chron. Helvet.
Bey Keßwyl vber / nahend Pfinn / vnnd bey einer halben Stund gutes Fußwegs vnd Sulgäw / vff der rechten Seiten der Tur / im Turgäw / gelegen. Ist zwar durch Fewer vnd viel Vnfäll verarmet / vnd heutiges Tags einem Dorff gleicher / als einer Statt; Das Schloß aber ist noch in gutem Wesen / so etwann die alten Freyherren von Sax beherrschet haben. Die hohe Herrlichkeit aber gehört zur Landgraffschafft Turgäw / vnd den zehen Haupt Orthen der Eydgnoßschafft.
Matthäus Merian: Topographia Helvetiae, Rhaetiae et Valesiae. , Frankfurt am Main 1654, Seite 59. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Helvetiae,_Rhaetiae_et_Valesiae_059.png&oldid=- (Version vom 2.4.2020)
