Namens Egilbardum, verordnet hat. Trithem. in Chron. Spanheim. fac. 246. Bey welcher Würde es in die 400. Jahr verblieben. Jetziger Zeit ist es dem Dom-Capitul zu Mayntz eingethan.
So ist auch in diesem Ländlein der schöne Fleck Geisenheim / von theils auch ein Stättlein / vnd Gysenheim genannt / zwischen obbesagten beyden Orten Rodesheim / oder Rüdesheim / vnd S. Johanns Berg / am Rhein gelegen: Item / Waluff / so in diesem Krieg sich wol bekannt gemacht / vnnd viel Schaden / sonderlich Anno 1631. gegen dem Ende desselben / gelitten hat / als die Schweden solches mit Gewalt erobert / vnd alles / was sie in den Waffen gefunden / nidergehawet haben.
Fritzlar / in Hessen / von Theils Frideslar / vnd Fritislar / genant; von welchem Ort Wilhelmus Dilichius, in seiner Hessischen Chronick / am 162. vnnd folgendem Blat / also schreibet: Der Thumbstifft allhie ist Anno 732. von Bonifacio, vnd die Statt bald darauff / auß der Statt Buriburg (dessen Lagerort man noch bey Fridslar / auff einem hohen Berge sehen kan) darumb / daß dieser Ort zu bewohnen bequemer / vnnd habhaffter / erbawet worden. Weiln auch die Eder / (oder Adraua Taciti; so in die Fulda laufft) nahend darbey / vnd sonsten die Gegend eben / der Boden geschlacht Obst / Wein / vnnd Hülsenfrucht zutragen bequem ist / so thut diese Statt / wegen lustigen Orts / es vielen vmbligenden Stätten weit bevor. Biß hieher Dilich. Anno 774. ward sie von den Sachsen / biß auff den Stifft / außgebrant. Dann / als S. Bonifacius, S. Petern zu Ehren / diese Kirch allhie erbawet / hat er / auß Prophetischem Geist gesagt / daß solche niemals durch Fewer werde verderbt werden. Derowegen / als selbiges mal solche die Sachsen anzunden wolten / ist sie von oben her ein solcher gäher Schrecken ankommen / daß sie schändlich zitterend / verwirret worden / vnnd nach Hauß fliehend vmbgekehret haben; wie Nicolaus Serarius lib. 3. Rer. Mogunt. notat. 27. pag. 494. auß den Annalibus Francorum, so der Graff von Nuenar herfür geben: Item / auß Lamberto Schafnab. oder Aschaffenburg. Reginone, vnd Mariano, schreibet. Landgraff Conrad zu Thüringen hat Anno 1232. wegen einer Strittigkeit / so er mit dem Ertzbischoff zu Mayntz gehabt / diese Statt / so drey Meilen von Cassel gelegen / vberzogen / die Vorstätte abgebrant / die Mühlen zerrissen / vnd die Brücken zerbrochen. Vnd da er vermeynet / er hätte sich also wol gerochen / vnnd im Abzug gewesen / da seyn etliche lose Weiber auff die Stattmawren gelauffen / haben den Hindersten entblöset / solchen vber die Zinnen heraußgereckt / vnd dem Landgraffen nachgeruffen / wann er nirgend hinzufliehen wüste / wolten sie ihme hiemit die Herberge gewiesen haben. Hierdurch er dann im Zorn widerumbzukehren bewegt worden / vnd hat die Statt von newem zubelägern / Fewer einzuwerffen / vnd zugleich zustürmen angefangen; darüber dann alle Gebäw in der Statt / Häuser / vnnd Kirchen / mit allen Männern / Weibern / vnd Kindern / biß auff etlich wenig / so herauß gefallen / vnd sich gefangen ergeben / jämmerlich verbrannt / auch folgenden Tags die Mawren vmbgeworffen / die Thürn nidergerissen / vnd die Klöster / etc. herumb abgebrannt worden seyn; wie beym besagten Dilichio part. 2. pag. 152. seq. vnnd Cyriaco Spangenberg in seiner Manßfeldischen Chronick cap. 253. zu lesen. Anno 1631. im Septembri, ward diese auff einer anmühtigen Höhe gelegene / mit einem Graben / vnnd Ringmawer / auch vielen hohen Thürnen verwahrete Statt / von Landgraff Wilhelmen in Hessen mit stürmender Hand / vnd hernach den 29. Ejusdem, von General Tilly wider erobert; hat auch folgends noch viel außgestanden: Wie dann Anno 1640. im Augusto / die Keyserischen diesen Ort einbekommen / vnd beyde Kriegsheer/ Keyser- vnd Schwedische / damals drey Tag lang gar nahe beysammen vmb diese Statt lagen. Es ist da ein feine Burgk / oder Schloß. Besiehe von diesem Ort / neben den angezogenen Scribenten / auch Albertum Cranzium lib. 2. Saxon. c. 10. G. Braun in Theatro Urbium, vnd Casp. Ens in delic. apodem. p. 215 seq.
Gerltzheim / oder Gerrensheim / am Rhein / zwischen Wormbs vnnd Oppenheim / auff halbem Weg zu Wasser / nahend der Bergstraß / vnnd auff der Seiten gegen Darmbstatt zu / in einem Morastigen Grund gelegen / Statt vnnd Schloß / so Anno 1631. vom König auß Schweden / mit Accord erobert / nachgehends aber widerumb quittiert worden. Ist dieser Zeit etwas bevestiget; vnnd Anno 1645. von den Frantzosen auß Wormbs vberstiegen / aber gleich darauff von der Chur Bayrischen Armee belägert / vnnd wider eingenommen worden.
Heiligenstatt / auff dem Eichsfeld / nahend Duderstatt gelegen / allda die Chur Mayntzische dieses Ländleins Regierung ist; vnnd von welcher Statt wir in einer geschriebenen Chronick folgendes gefunden haben: König Dagobertus auß Franckreich ward gantz aussatzig / daß er Franckreich verlassen muste / kam in Teutschland / da jetzund Heilgenstatt ligt / vnd bawet da eine Vestung / noch genannt die alte Burgk / vnnd wohnete da mit seinem Weib. Nun waren vor Zeiten zween Brüder / Christen / Aureus, vnnd Justinus, die giengen Wallen / vnnd kamen in einen Hoff / Rustefeld genannt / vnd herbergten allda die Nacht; Morgens giengen sie durch den Wald / da wurden sie von den Vnglaubigen ermordet / vnd da begraben. Dagobertus ritte also aussätzig an die Jagt / vnnd einen Morgen / in dem Sommer / kam er in den Wald / stund auß Müdigkeit / von seinem Pferd ab / hefftet es an einen Ast / leget sich nider in den Taw / vnnd schlieff; vnd ward an dem Ort / da ihn der Taw berühret hat / der Aussätzigkeit erlediget. Sein Gemahlin zog wider mit ihme auff die stätt / Er thät seine Kleyder von sich / vnd wältzte sich / vnd ward gantz
Matthäus Merian: Topographia Colonia et al.. Frankfurt am Mayn: Frankfurter Kunstverein, 1646, Seite 30. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Mainz_Trier_K%C3%B6ln_030.jpg&oldid=- (Version vom 31.7.2018)
