die edlen Rheinlangcken / so anders nichts / als Grund-Föhrinen / welche / auß dem BodenSee / in das frische Rheinwasser herauff / auff den Laich ziehen: Hat schöne Jagten von Rehen / vnnd Hasen / dann sonsten kein Hochgewild in dieser Ebne bleiben mag; vil And- vnnd Krametsvögel / welches allda alles gebannt / vnd der Herrschafft vorbehalten. Die vralte Pfarrkirchen / allda ist vom Rhein gebrochen / dargegen ein andere fast mitten in dem Bezirck auffgebawt / hat folgende Dörffer / als / Wisenrain / Oberloch / Weyler / Holtz / vnd Stalden: Gräntzt oben zu / an das Gericht Dornbüren / vnnd Grafschafft Embs / neben zu an die Graffschafft Bregentz; wie von diesem was gesagt / Johann Georg Schlee / in Beschreibung der Landschafft vnderhalb S. Lucis Staig / etc. fol. 18. seqq. berichtet.
Von Theils Molberg vnd Molburg genannt / ein Schloß vnterhalb Ettenheim / vnnd oberhalb Kipenheim / welches An. 1637. Hertzog Bernhard zu Sachsen (hernach noch in diesem Jahr / der General Johann von Werth / folgends wider der Gegentheil / vnd dann An. 1641. die Keyserischen erobert haben; vnd darauff die Mauren vnd Pforten geschleifft / vnnd verbrandt worden seyn. In Tom. 4. Theatri Europaei stehet / fol. 574. & seqq. daß der Käyserische General Wachtsmeister Gilles de Hasi, als er An. 1641. den 10. Aprilis / N. Cal. Wildstätt mit Accord erobert / hierauf für das Marggräffisch-Badische Schloß Malberg / oder Maulburg / gezogen seye / auff solches 190. Schüß / auß groben Stücken gethan / vnd es den 7. 17. Aprilis / erobert habe; vnnd daß hernach von den Keyserischen / die außwendigen Mauren geschleiffet / die Pforten verbrennet / vnd solches Maulberg zu fernerer Defension vntüchtig gemacht worden seye. Gehört der Zeit gantz Herrn Marggraf Wilhelmen / nacher Baden / vnd solle / dem Bericht nach / fein gebawet / aber nicht wider befestiget seyn.
Zwo Meil von Ravenspurg / vnnd eine Meil von Merspurg gelegen / vnnd dem Bischoff zu Costantz gehörig; deßwegen Anno 1356. (aliis 1365.) der 56. Bischoff zu Costantz / Johannes III. von Cunrado von Honburg / einem Ritter / so dieses Stättlein jhme billicher / als dem Bischoff / gehörig zu seyn vermeynte / (wiewol sein deß Bischoffs Recht / darzu Keyser Carolus IV. bestättiget hatte) im Bischoffshoff zu Costantz / vber der Nachtmahlzeit / vmbgebracht worden ist. Gibt guten Weinwachs da. Anno 1079. eroberte Abbt Vlrich zu S. Gallen / dieses Marckdorff / so damals einem Graf Othen zuständig war. Folgendts Anno 1084. in dem Krieg der zween Aebbte auß der Auw / vnd S. Gallen / ward dieser Orth geplündert / vnnd in den Brandt gesteckt.
Anno 1643. ward Marchdorff / sampt Buchhorn / vnd viel andern Orten / biß nach Lindaw / auff ein halbe Meil von den Weymarischen außgeplündert. Gaspar. Bruschius de Episcpp Germ. cap. 4. p. 46. Johan. Guler. lib. 8. Rhaetiae.
Ein MönchsCloster / Praemonstrater Ordens / zwischen Ehingen / vnnd Riedlingen / nahend der Thonaw / auff einem starcken Felsen / gelegen; so stattlich gebawet gewesen / aber / im nächsten Teutschen Krieg / auch vbel zugerichtet worden seyn solle. Anno 1171. hat Hugo III. Pfaltzgraf von Tübingen / dieses Closter / so zwar vorher gestanden / aber eingangen war / wider auffgerichtet / vnd / nach Abthun der sieben Weltlichen Domherren / so die Hertzogen in Schwaben Hermanni Vatter / vnd Sohn / die vmbs Jar 1000. vnd 1006. gelebt / allhie eingeführt hatten / Praemonstrater Mönch / zu Ehren der H H. Petri / vnd Pauli allda angeordnet; darinn die Herren von Stein / vnd in einer besondern Capell / die von Hoheneck / jhr Begräbnuß haben. Der erste Probst / Eberhardus genandt / starb Anno 1178. vnnd der letste Probst / vnd erste Abbt / Henricus Meerstetter /
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 126. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_171.jpg&oldid=- (Version vom 31.7.2018)
