General ReichsFriedens Execution, gemacht / vnd An. 50. zu Mäyntz gedruckt / numero 54. also: Spätische Gamerdingische Vormündere contra Johann Sebastian Späten von Zweyfalten / die restitution deß entzogenen Guts Neuffern betreffend.
Ein Dorff vnder der Fürstlichen Würtembergischen Vogtey Vaihingen / auff einem sehr hohen Berg / mit sehr tieffen Thälern vmbgeben. Hat den Nahmen von den Nussen / deren daselbst viel; vnd nicht nur allein dieselben / sonder ein herrlicher Wein in der Menge / vmb das Dorff herumb; auch Früchten / Aepffel / vnd anders / wachsen. Zu deß Crusii Zeiten / hat Johan. Jacob Reischnacher von Reichenstein / ein schönes Schloß / mit einer Mawr vnnd Thürnlein / an allen vier Ecken / allda gehabt / deme viel von den Nußdorffern vnderworffen gewesen. Es hatte damaln 2. grosse Kirchen / mit vielen Säulen in dem Dorff.
Ein Dorff / vnnd Bad / nahend Rotenburg am Necker / in der Graffschafft Hohenberg gelegen / so Theils ein Stättlein nennen.
Ligt im Schwartzwald / nicht weit von Sultz / vnnd Wolffach / war vorhin Zimerisch / jetzt ist dieses Stättlein Oesterreichisch / vnd wird zur Grafschafft Hohenberg gerechnet. Das Kloster allhie haben die Hertzogen von Teck gestifftet / hat eine Priorin / Augustiner Ordens. Munsterus in Cosmogr. & Crusius in Annal. Suevic.
Es ligt auch ein Oberndorff / oder Oberdorff / nahend beym Lech / vnd schier gegen der Statt Rain über / aber noch in Schwaben / so ein Schloß / vnnd Herrschafft / Anno 1553. durch die Herren Fugger / dem Wolfgango Mareschalco (vielleicht von Pappenheim / ) wie Crusius berichtet / aberkaufft.
Ein Adelich reformiert FrawenStifft / im Würtemberger Land / am Fluß Bottwar / oberhalb der Statt Bottwar / nahend Beilstein / vnd Liechtenberg gelegen / so der Ritterschafft einverleibt ist / als man findet. Theils wollen / es habe dieses Closter Keyser Otto III. Anno 994 Andere / ein Schwäbischer grosser Herr / Otto genandt; die dritten / daß es ein Edler von Beihelstain; vnnd dann die vierten / daß solches ein Graff von Bottwar / gestifftet.
Ein Fleck / nahend dem Vrsprung der Iler / von welchem Fluß Christophorus Hurter, in deß Ilerstroms / vnd beyderseits vmbligenden Algöws Beschreibung / im Jahr 1619. zu Augspurg außgangen / also / vnder anderm meldet: Die Iler entspringt in dem Tyrolischen Gebürg / nicht weit vom Lech / an dreyen vnderschiedlichen Orthen / die kommen bey Oberstorff zusammen / vnnd bekompt alsdann erst den Namen; laufft zwischen dem Alpgebürg herab / vnnd durch die Statt Kempten / allda man anfahet mit Flötzen zu fahren / biß sie ein halbe Stund Wegs oberhalb Vlm in die Thonaw kompt / vnd dieselbe Schiffreich machet. Was auff der Rechten der Iler ligt / biß die Rotlach darein kompt / vnd ferner zwischen der Wertach / vnd der Vils / biß nahe an Kauffbeüren / gehört dem Bischoff von Augspurg zu. Die fürnembste Pflegen darinne seynd / Füssen / Burgberg / Nesselwang / Oberdorff / vnnd weiter herunden an der Güntz / Schöneck. Auff der andern Seiten der Iler / erstreckt sich die Graffschafft Rotenfelß weit in die Alpen hinauff / welche / sampt der Herrschafft Stauffen / dem Freyherren von KönigsEck zuständig ist. Weiter auff derselben Seiten / gegen der Statt Ysin (Ysni) besitzt dz Hauß Oesterreich die Herrschafft Hoheneck / auch viel Dörffer vmb Leutkirch / biß an die Statt Ravenspurg / welche die Landvogtey Schwaben
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 144. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_192.jpg&oldid=- (Version vom 31.7.2018)
