Da man zahlt 1111. Jahr / wär diese Figur gemacht fürwar. Mars G. M. C. XI. vor Zeiten war diß ein Abgott; Jetzt ists bey den Christen ein Spott. Das Burgerhauß / oder Herrenstuben / ist auch fein gebawet / darneben vor Zeiten die Echetz solle geflossen seyn / so jetzt vor der Statt laufft; daran viel Papyr-Pulver-Gewürtz / vnd andere Mühlen seyn. Die Klöster Zwyfalten / Salmonsweiler / Bebenhausen / Königsbrunn / vnnd Marchthal / haben da jhre Höff. Wo der Schuhmacher Zunfftstuben von Stein gebawet / stehet / da solle vor Jahren der Juden Schul / oder Synagog / gewesen seyn; daher auch selbige Gassen / die Judengaß genennet wirdt. Crusius in Annalib Suevic. Dresserus de Urbibus Germaniae Limnaeus de Jure publ. lib. 7. cap. 42. Besoldus in Thesauro pract. voc. Freyheit. & in Documentis redivivis Monasteriorum, itemque Monimentis Virg. Sacrar. Ducat. Würtenb. p. 26. seq. & 340. & Reusnerus de Urbib. Imperialibus.
In dem nächsten Teutschen Krieg / hat Reutlingen auch viel außgestanden / vnd allbereyt An. 1631. Sie der Käyserliche General / Graf Egon von Fürstenberg / nach Einnehmung Minsingen / vnnd deß Rauschensteigs / mit Accord erobert: Wie in der Histori deß Kön. Schwedischen im Teutschland geführten Kriegs / B. Ph. Kemnitzii, fol. 181. gesagt wird. Anno 1643. im Jenner hat ein Weymarische Parthey sich dieser Statt bemächtigt. Anderer KriegsFäll / vnnd Beschwerungen / zugeschweigen.
An der Thonaw / 5. oder 6. Meilen oberhalb Vlm / davon oben bey Mengen etwas gesagt worden. Ist jetzt wider Oesterreichisch; vnd hat in diesem Teutschen Krieg viel außgestanden. Es ligt zwischen Riedlingen vnnd Ehingen das Kloster Marthal / oder Marchthal / bey der Thonaw / auff einem starcken Felsen; davon in deß Crusij Schwäbischen Chronick part. 2. lib. 11. cap. 6. ein mehrers zu lesen.
An der Entz / bey Vaihingen / ober / vnnd vnder / 2. Marcktflecken / deren der obere ein Ganerbschafft / der vndere aber Fürstlich Würtembergisch ist; wiewol Theils Ober-Rixingen ein Stättlein ins Ampt Vaihingen gehörig / nennen.
Ein Praemonstratenser Closter / 2. Meilen von Vlm / vnnd ein halbe Meil von Weissenhorn gelegen / so einen Hof in der Statt Vlm hat / vnd zu dem Römerzug monatlich auff 2. zu Roß / vnd 10. zu Fuß / oder 64. Gulden / angelegt ist; auch desselben Abbt Standt / vnd Sitz / bey den Reichs: vnd Craiß-Tägen hat. Die Jährliche Gebühr zu Vnderhaltung deß CammerGerichts / belaufft sich auff 100. Gulden. Desselben Stiffter war / nach deß Bruschii Meynung de Episcop. Germ. c. 3. p. 26. der 38. Bischoff zu Chur / Conradus, ein geborner Graff zu Bibregk / An. 1126. Andere aber / vnd darunder Crusius part. 2. Annal. li. 9. c. 12. (da er auch die Aebbte allhie setzet / ) sagen / daß solches Closter in gemeltem Jar / von Bertholdo, Sifrido, vnd Conrado, leiblichen Brüdern / vnd Grafen von Bibreck / vnd von Frawen Demuth von Zollern / deß alten Bertholdi Gemahlin zu erbawen angefangen worden / welche Fraw alle jhre Güter / vnnd auch das Schloß daselbst gelegen / wo hernach der Garten / darzu verschafft habe.
Zwey Schlösser / Hoch: vnnd Nider Ronau / bey der Camlach / nit weit von einander gelegen / deren das erste (so nunmehr fast darnider ligen solle) den Herrn Vöhlin Freyherren / nach Ilerthissen; das Andere aber Herrn Hanß Dieterichen Freyherrn von Freyberg / auf Rosau / vnd Haldenwang / der Zeit gehörig / vnd davon nit weit das berühmbte Krumbacher Bad gelegen ist. Crusius schreibet part. 3. Annal. lib. 11. c. 25. daß Eberhard von Freyberg / Anno 1557. die Herrschafft Ronau / vmb 25. tausendt. fl. erkaufft habe.
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 162. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_214.jpg&oldid=- (Version vom 31.7.2018)
