Am Höberg / oder Heuberg / zwischen Sultz am Necker / vnd Balingen an der Teyah / fast auff halbem Weg / (oder zwo Stund von Balingen / ) vnd an den Gräntzen der Graffschafft Hohenberg / vnd der Grafschafft Zollern / aber im Hertzogthumb Würtemberg gelegen / deme auch vor der Nördlinger Schlacht dieses Stättlein / vnnd zugehörig Gebieth zugestanden / der Zeit aber Gräfflich Schlickisch ist; gleichwol das Exercitium der Augspurgischen Confession hat. Solle seyn An. 1274. mit einer Mawer vmbgeben worden. Ist vor Zeiten Hohenbergisch gewesen / vnd durch Heurath ans Hauß Würtenberg kommen. Es hat die Statt Rosenfeld allwegen einen Vogt / vnnd OberVogt gehabt / dahin etliche Amptsflecken / vnd darunter Leuttingen / gehöret haben / daselbst es einen Schaffner hatte / so die Zehenden eingesamblet / was gen S. Georgen ins Kloster gestifftet worden / wie in einer geschriebenen Chronick stehet.
Am Necker / ein Meil-Wegs von Tübingen / vnd in der Oesterreichischen Graffschafft Hohenberg / sampt einem Schloß / gelegen / der Röm. Catholischen Religion zugethan. Es ist vorhin eine Statt allhie gestanden / die Theils LandsCron nennen / vnd die Anno 1212. durch Erdbidem / zu Grund gangen / vnnd an jhrer statt diese newe An. 1271. oder 1280. ist erbawet worden / so nicht groß / vnd von schlechten Häusern ist. Auff einem Berg / Weilerburg genandt / lag vor Zeiten das alte Schloß Rotenburg / da noch hohe Mawren stehen; vnnd vnten / ein wenig vber der Statt Rotenburg ist noch etwas von Gemäwer / da die besagte alte Statt / gelegen. In der Statt ist ein altes Carmeliten Kloster / in dessen Bibliotheck Martinus Crusius Anno 1595. ein alte Bibel / so eine Jungfraw gar schön geschrieben / gesehen hat. Die Capuciner haben auch ein Kloster allhie. Vber dem Necker / oder gegen vber / ligt die Statt Ehingen / zugenandt am Necker / auch Oesterreich-Hohenbergisch; daselbst S. Mauritii Probstey ist / vmb das Jahr Christi 1320. von den Grafen von Hohenberg auffgerichtet / vnnd mit Jährlichem Vnterhalt eines Probsts / zwölff Domherrn / vnd etlicher Vicarien / auch eines Prediger- vnd Pfarrers / reichlich begabt. Vnd seyn mitten in dieser StifftsKirchen 3. Monumenta der Stiffter zu sehen. Seyn auch anderer vornehmen Leuthe Begräbnussen daselbst. So hat es auch ein NonnenKloster allhie / die Ober-Clauß genandt; darinn Anno 1589. ein Priorin / Namens Elisabeth Distlin / gelebt / welche im 15. Jahr jhres Alters hineynkommen / 90. Jahr darinnen geblieben / vnd also allbereyt damaln / wie man berichtete / 105. Jahr alt gewesen ist. d. Crusius in Annal. Suevic. besihe vnten Schemberg.
Deß Churfürsten / vnd Pfaltzgrafen Ludovici Tochter / vnnd Graf Ludwigs zu Würtemberg / deß ersten Hertzogs / Eberhardi mit dem Bart / Vatters Gemahlin / Fraw Mechtild / hat / nach deß besagten jhres Herrn Todt / sich an Ertzhertzog Albrechten zu Oesterreich / der hohen Schul Freyburg in Breisgöw Stifftern / verheuratet / auch denselben / wie Er vor Ihr verstorben / allhie / als in jhrem Wittumbs Sitz / Anno 1463. prächtig zur Erden bestattet. Anno 1508. ist allhie ein so grosser Hagel gefallen / daß davon nicht allein die Fenster; sondern auch die Ziegel auff den Tächern zerbrochen worden seyn. Baselius. Anno 1643. im Jenner / ist ein ziemliche Anzahl von der Weymarischen Reuterey in Rotenburg kommen. Anno 44. ist die Statt / durch Verwahrlosung / abgebronnen: Hat auch sonsten Sie / vnd Ehingen / so jenseit deß Neckers ligt / im nächsten Krieg / viel außgestanden. Anno 1648. hat es zu Rotenburg eine gute Stundt lang Blut geregnet. Was aber die Oesterreichische Grafschafft Hohenberg / darinn diese Orth gelegen / anbelangt / so wirdt dieselbe in die ober vnd vndere getheilet. In der obern ligen das zerstörte alte Schloß Hohenberg; die Stättlein Bintzdorff / Schemberg / vnnd Fridingen / mit 15. Dörffern; das Dorff Spaichingen vnderm Thal; die Clausen / oder das Clösterlein Kilberg. Die vndere Grafschafft
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 163. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_215.jpg&oldid=- (Version vom 31.7.2018)
